Анатолий Николаев: «Бэрэсидьиэн бүддьүөт миэстэтин эбэр туһунан этиитин үөрэ иһиттибит»
Хотугулуу-Илиҥҥи федеральнай университет ректора Анатолий Николаев, РФ бэрэсидьиэнэ Владимир Путин Анал этиитин кэннитэн санаатын үллэһиннэ.
— РФ бэрэсидьиэнэ Владимир Путин Анал этиитигэр үөрэх кыһаларыгар бүддьүөт миэстэтин эбэр туһунан бэлиэтээбитин үөрэ иһиттибит. Ол эрээри, устудьуон үөрэҕин бүтэрэн баран үлэтэ суох хаалбатын туһугар, ханнык исписэлиистэр ирдэнэллэрин эрдэттэн үөрэтэн, билэн баран бүддьүөт миэстэтин элбэтэр ордук. Ити каадыр боппуруоһун быһаарарга төһүү күүс буолар.
Билигин биһиги ханнык хайысхалары сайыннарары быһаарыахтаахпыт. Бу Уһук Илин уокуругар барытыгар сыһыаннаах тирээн турар боппуруос.
Билиҥҥи туругунан, Саха сиригэр педагогтар уонна мэдиссиинэ үлэһиттэрэ тиийбэттэр. Ордук мэдиссиинэҕэ үлэ миэстэтин толору хааччыйбакка олоробут. Ону таһынан, аныгы үйэ цифровой экэниэмикэтигэр үлэһиттэри бэлэмниир сорук турар. Онон үрдүк үөрэх кыһаларыгар бүддьүөт миэстэтин элбэтиини эрэгийиэҥҥэ ирдэниллэр каадырдары кытта тэҥҥэ тутан көрөр тоҕоостоох. Федеральнай университет быһыытынан ити боппуруоска Уһук Илин уокуругу бүттүүн хабыахтаахпыт. 2019-2020 үөрэх дьылыгар дойду хааһынатын суотугар ХИФУ-га тус сыаллаах үөрэххэ 3527 миэстэ көрүллүбүтэ, — диэн эттэ.
ХИФУ пресс-сулууспата.