Анатолий Григорьев: “Кыайыыны Сунтаар олохтоохторугар аныыбыт”

Ааптар: 
Бөлөххө киир:

Кулун тутар 17-19 күннэригэр Сунтаарга Николай Тарскай кэриэһигэр көҥүл тустууга Саха сиригэр биирдиилээн уонна хамаанданан бастыыр иһин чөмпүйэнээт ыытыллан түмүктэннэ. Сунтаар улууһун баһылыга, тустуу федерациятын бэрэссэдээтэлэ Анатолий Григорьев чөмпүйэнээт түмүгүн туһунан “Саха сирэ” хаһыакка анаан бэйэтин санаатын маннык үллэһиннэ.

Петр ПАВЛОВ, “Саха сирэ” хаһыат, edersaas.ru


Чөмпүйэнээт тэрээһиннээхтик ыытыллыытыгар туруоруллубут ирдэбиллэри биһиги барытын толордубут, — диир Анатолий Васильевич. – Итиэннэ саамай сүрүнэ, бу тэрээһиҥҥэ ким даҕаны туора турбакка, нэһилиэк баһылыктара бэйэлэрэ бириис олохтоон, тэрилтэ салайааччылара анал бириистэри туруоран, дьон-сэргэ олус түмсэн, холобур, бу түһүлгэ (помост) тутан, көрөөччүлэр олорор сирдэрин оҥорон, улахан тэрээһини ситиһиилээхтик түмүктээтибит.
Чөмпүйэнээт үрдүк таһымнаахтык ааспытын ыалдьааччылар сыаналаабыттара – биһиэхэ улахан махтал кэриэтэ. Спорт министиэристибэтэ, Тустуу федерацията биһиги этиибитин ылынан, ыраах, Дьокуускай куораттан тыһыынча килэмиэтир сытар сиргэ кэлэн, чөмпүйэнээти Сунтаарга ыытыылара саамай сөптөөх хардыы дии саныыбын. Тоҕо диэтэххэ, бу маннык тэйиччи сирдэргэ күрэхтэһиилэри ыыттахха, спорт өссө киэҥник тарҕанан, өссө үрдүк таһымҥа тахсыа.
Чөмпүйэнээт бырааһынньыктыы быһыыга-майгыга ыытыллыбытыттан, икки күн устата саалаҕа толору мустубут дьон-сэргэ сүргэтэ көтөҕүлүннэ. Онон баһылык буолан туран, бэйэм дьоммор-сэргэбэр барҕа махтал тылларбын аныыбын. Өссө даҕаны бука бары маннык түмсүүлээх, сомоҕолоһуулаах буолуоҕуҥ!

-Тустуу историятыгар аан бастаан, өрөспүүбүлүкэ чөмпүйэнээтигэр Сунтаар улууһун хамаандата бастаабытынан эҕэрдэ! Күрэхтэһиини үрдүк тэрээһиннээхтик ыыппыккыт тэҥэ, аны хамаандаҕыт кыайыылааҕынан таҕыста.
Күрэхтэһиигэ эрдэттэн бэлэмнэммиппит. Махтаныах тустаахпын тренердэргэ, хамаанданы үчүгэйдик бэлэмнээбитэрин иһин. Ону таһынан спортсменнары үчүгэйдик аттаран туруордулар диэхпин наада. Аһаҕастык эттэххэ, биһиги үс бириистээх миэстэ иһигэр киирбит киһи диэн баҕа санаалаах этибит. Онтукабыт уолаттарбыт олус үчүгэйдик, аһыллан туһуннулар. Саамай кылаабынайа, дьоммут-сэргэбит, ыалдьааччылар улахан күүс-көмө, өйөбүл буоллулар. Олохтоох дьоҥҥо, хаһаайыттарга “истиэнэлэрэ кытта көмөлөһөр” диэн мээнэҕэ эппэттэр. Чахчы оннук эбит диэн биһиги сыаналаатыбыт. Бу кыайыыны биһиги Сунтаарбыт улууһун олохтоохторугар, спорду таптааччыларыгар аныыбыт.

-Анатолий Васильевич, тустуу сайдарын туһугар Сунтаарга туох үлэ ыытылларый?

Сунтаар тустуута иккис тыынын ылан эрэр диэн этиэхпитин баҕарабыт. Биһиэхэ, манна, 2006 сыллаахха Саха сирин норуоттарын 4-с спортивнай оонньуулара ыытыллыбыттара. Онно анаан улахан тутуулар тутулланнар, холобур, олус үчүгэй манеж үлэҕэ киирэн, спорка улахан хамсааһын тахсыбыта. Итиэннэ тута сөрөөн Олимпийскай эрэллэри бэлэмниир өрөспүүбүлүкэтээҕи оҕо спортивнай оскуолата тэриллибитэ. Нэһилиэктэрбитигэр төһө кыалларынан көҥүл тустуу тренердэрин үлэлэтэ сатыыбыт. Уопсайынан, Саха сиригэр бастакы нүөмэрдээх спорт көрүҥэр бары түмсэн үлэлиэхтээхпит. Ханна даҕаны, ыраах уһук сытар нэһилиэктэргэ сүрдээх үчүгэй айылҕалаах оҕолор бааллар, кинилэр талааннарын арыйар гына ситимнээх үлэни ыытыахха наада диэн бырагыраама оҥосто сылдьабыт. Саамай сүрүнэ, сотору кэминэн бу Сунтаар сириттэн олимпийскай мэтээл аҕалар ыччаппыт үүнэн тахсара буоллар диэн баҕа санаалаахпыт.

Петр ПАВЛОВ, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0