Бэҕэһээ Саха сирин Ил Дархана Айсен Николаев Анал этиитин өрөспүүбүлүкэ Судаарыстыбаннай Мунньаҕар оҥордо. Анал этии туһунан экологтар снаааларын үллэстэллэр.
Сахамин Афанасьев, экология, айылҕа баайын туһаныы уонна ойуур хаһаайыстыбатын миниистирэ:
— Ил Дархан Айсен Николаев хас биирдии Саха сирин олохтооҕор сыһыаннаах тиэмэлэри таарыйда, айылҕа харыстабылыгар ордук болҕомтотун уурда. Анал этиитин кэмигэр өрөспүүбүлүкэ “АЛРОСА” салалтатын кытта кэпсэтэн, Үүнэр көлүөнэ фондун үбүн улаатыннарарын туһунан эттэ. 2019 сылтан Бүлүү бөлөх улуустарын сорох нэһилиэнньэлээх пууннарын ыраас уунан хааччыйыыга үп көрүллүөҕэ. Маны таһынан, кытаанах бөҕү харайыы саҥа систиэмэтигэр киириини бэлиэтээтэ, бу кыһалҕаны бырабыыталыстыба федеральнай былаас уонна бэйэни салайыныы уорганнарын кытта үлэлэһэн быһаарарыгар эттэ.
Прасковья Гоголева, биологическай наука кандидата, ХИФУ профессора:
— Өрөспүүбүлүкэбит ыраах улуустарыгар кытаанах бөҕү дьаһайыыга уматан иһэр инсинератордары туруоруохха. Бу транспортировка кыһалҕаларын быһаарыа этэ. Маныаха анал үөрэхтээх киһини аныахха сөп.
Любовь Киприянова, РФ үтүөлээх эколога, экологическай уопсастыбаннай сэбиэт чилиэнэ, айылҕа харыстабылын салаатын бэтэрээнэ:
— Кытаанах бөҕү дьаһайыы кыһалҕатын быһаарыахха диэн Айсен Николаев сөпкө бэлиэтээтэ. Бу кыһалҕа биһиги өрөспүүбүлүкэбитигэр турбута быданнаата, маны быһаарар кэм кэллэ. Уопсай үлэнэн, сыранан эрэ Сахабыт сирин ыраас, чөл туруктаах оҥоруохпут.
Иннокентий Суздалов, Намнааҕы айылҕа харыстабылын госинспектора:
— Ил Дархан анал этиитэ улахан суолталаах, өрөспүүбүлүкэбит инникитин быһаарар. Айсен Николаев Саха сирин экологиятын туһунан ыйааҕар кыһалҕалары быһаарарга сүрүн күүһү ууруохха диэбитэ. Промышленнай тэрилтэлэргэ кытаанах ирдэбиллэри туруоруохха диэн этиитин кытта сөбүлэһэбин. Анал этиигэ кытаанах бөҕү дьаһайыыны киллэрдэ. Билигин нэһилиэктэргэ сыбаалкалар ыһылла сыталлар, бу туһугар ким да эппиэтинэһи сүкпэт. Онон, Ил Дархаммыт айылҕабыт чөл туруктаах буоларыгар болҕомто уурарын үөрэ иһиттим.
Экология, айылҕа баайын туһаныы уонна ойуур хаһаайыстыбатын миниистиэристибэтин пресс-сулууспата.