Анаалыстар түмүктэрэ билиннэ — Саха сиригэр коронавирус суох

Бөлөххө киир:

Саха сиригэр коронавируска уорбаланан, балыыһаҕа киллэриллибит дьон анаалыстара бу ыарыыга сыстыбатахтарын бигэргэттэ. Билигин балыыһаҕа ОРВИ ыарыыта сибикилээх өссө 5 киһи кэтээн көрүүгэ хаалла. Кинилэр куорат клиническэй балыыһатын инфекционнай отделениетыгар сыталлар. Быраабыла быһыытынан, балыыһаҕа 14 күн хаалыахтаахтар. Ити туһунан СӨ доруобуйа харыстабылын миниистирэ Елена Борисова бүгүн суруналыыстары кытары көрсүһүүгэ иһитиннэрдэ.

edersaas.ru

Билигин аан дойдуга коронавируһунан ыалдьыбыт киһи ахсаана 24 тыһыынчаҕа тиийдэ, кинилэр үгүстэрэ Кытайга булулуннулар. Арассыыйаҕа, барыллаан чахчынан, икки түгэн бэлиэтэммитэ. Дьолго, кэтээн көрүү кэнниттэн биллибитинэн, кинилэргэ коронавирус инфекцията булуллубата. Лаборатория чинчийиилэрин түмүктэрин бигэргэтии булгуччулаах түһүмэҕинэн анаалыстары Новосибирскайга научнай-чинчийэр институкка ыытыы буолар. Манна “Вектор” научнай кииҥҥэ куортан, сибиинньэ гириибиттэн, коронавирустан тутулуга суох анаалыстар бары ыытыллаллар. Новосибирскайтан бүтэһик түмүктэр кэллилэр, Саха сиригэр коронавирус суох”, — диэтэ миниистир.

Елена Борисова коронавирус инфекцията тарҕанарын утары дьаһаллар ылыллалларын туһунан кэпсээтэ. Эмчиттэр коронавирустаах киһи булулуннаҕына, бастакы көмөнү оҥорорго үөрэннилэр, сытар балыыһалар суһал ыарыһаҕы ыларга бэлэмнэр, аэропортарга уонна тимир суол станцияларыгар Кытайтан уонна онтон чугас дойдулартан кэлэр дьону икки төгүл бэрэбиэркэлииллэр. Аэропортарга эбии биэс тепловизоры атыылаһарга 7 мөлүйүөн солкуобай, тыҥа искусственнай аппараатын атыылаһарга 30 мөлүйүөн солкуобай үп көрүлүннэ. Саха сирин эмтиир тэрилтэлэрэ үлэһиттэригэр уонна уонна эмтэнээччилэригэр куттал суох буоларын хааччыйарга мөлүйүөн курдук маасканы саппааһырдылар. Оттон чааһынай аптыакалар Росздравнадзор хонтуруолунан мааскалары бэйэлэрэ атыылаһаллар.

Миниистир нэһилиэнньэҕэ аймалҕаны үөскэппэккэ, судургу быраабылалары тутуһарга, дьон элбэхтик мустар сиригэр сылдьыыны хааччахтыырга уо.д.а. сүбэлээтэ.
“Доруобуйа харыстабылын министиэристибэтэ уонна Роспотребнадзор эрэ кырдьыктаах иһитиннэриилэри биэрэр”, — диэн сымыйа, күүркэтиилээх сурахтарга итэҕэйбэттэригэр ыҥырда.

Надежда ЕГОРОВА, “Саха сирэ”, edersaas.ru

Андрей СОРОКИН түһэриитэ.

+1
0
+1
0
+1
0
+1
0
+1
0
+1
0
+1
0