Амманы харыстыаҕыҥ!

Бөлөххө киир:

Бу күннэргэ бассаап ситиминэн, Амма кэрэ айылҕатын маһын ханнык да бырайыагынан кэрдэримэҥ диэн кэпсэтии бара турар.

edersaas.ru, Марта Николаева

Ол мөккүһүүтүгэр бириэмэни ыыппакка, Раиса Николаевна Тимофеева- Михайлова салайааччылаах «Уран тыл оһуора» хоһоонньуттар түмсүүлэрэ Амма кэрэ айылҕатын хоһоонунан хоһуйарга ылсыстылар. Салайааччыбыт Раиса Николаевна үтүө тылын истээт, хоһоонньуттар кыл түгэнинэн, Амма кэрэ айылҕатын туһунан хоһуйдулар. Айылҕа маанылаабыт дойдутун маһа-ото туһата суох кэрдиллибэтин диэн биир санааҕа түмүстүлэр. Кинилэр Амма кэрэ айылҕатын дьүһүйдүлэр, кэлэр көлүөнэҕэ чөл, тыыннаах айылҕаны тыыппакка хаалларарга санааларын туһаннылар. Онон ааҕааччыларга айымньыларбытыттан сороҕун эрэ билсиһиннэрэбит.

Таҥара таба тайаммыт,
Дьиҥнэээх ырай дойдута,
Күлүмүрдэс ыраас уулаах
Оо,Амма,ааттаммат кэрэҕин.

Эн ыраас кытылгар
Күн үөрэ күлүмнүүр,
Салгыныҥ ураты ырааһын,
Сылдьыбыт эрэ суохтуур.

Кэрэ Амма тула
Аар хатыҥнар үүнэллэр,
Чиргэл тиит мастарыҥ
Халлааҥҥа харбаһан үрдүүллэр.

Маннык үтүө дойдуга
Кэрэ эрэ кэккэлэстиин
Ааттыын ыраас Амманан
Саха саргыта чэлгийэр.

Сарыалыйа

Амма Айылҕатыҥ Кэрдимэҥ!

Кэрдимэҥ дуу мастары
Амма кэрэ тыаларын,
Тыытымаҥ дуу тииттэри
Күөх чээлэй умнастарын.

Тэпсимэҥ алаастары
Сардааналаах кырдалын,
Хайытымаҥ тырыта
Ийэ сирбит тымырын.

Сүһүрдүмэҥ уулары
Дьэҥкир иһэр уубутун,
Быһымаҥ үрэхтэри
Эбэбит салааларын.

Айыылар көмөлөһүҥ
Хара дьайы киллэримэҥ,
Айыы сирин Харыстааҥ
Кэлэр ыччат туһугар!

Раиса Тимофеева-Михайлова

Амманы тыытымаҥ!

Тыа маһын эргинэн байымаҥ,
Сир дойду хаххатын тыытымаҥ,
Эйгэтэ ыһыллан хаалыаҕа,
Тулата кураайы буолуоҕа.

Кыыс Амма эбэни аһыныҥ,
Тулалыыр тыа маһын кэрдимэҥ,
Тулуна иэдээнин умнумаҥ,
Айылҕам иэстэһиэ — сэрэниҥ.

Бу Саха кыһаммат дэтимэ,
Туруулас, таах сытан биэримэ,
Ыар дьылҕа кинини тумуннун,
Ыарыктаах бу дьаһал туолбатын.

Арчылаа — эн тайҕаҥ баар буоллун,
Кыыс Аммаҥ уолбатын уһуннун,
Көмүскээ — Урааҥхай туруннун,
Харыстыыр эн санааҥ — дьэ туоллун.

Сата Уола. 12.04.2020

Марта Николаева, edersaas.ru саайтка анаан

+1
0
+1
0
+1
0
+1
0
+1
0
+1
0
+1
0