Бэҕэһээ Амма өрүскэ муус харан, уу таһыма үрдээн, кутталлаах балаһыанньа үөскээтэ. Сарсыарда уу таһыма 967 сантымыатыр. Ит аата кутталлаах бэлиэттэн 40 сантымыатырынан улахан. Миэстэтигэр Быыһыыр сулууспа үлэһиттэрэ уонна өрөспүүбүлүкэтээҕи суһал хамыыһыйата үлэлии сылдьаллар.
«Бөтүҥ нэһилиэгин аннынан муус харбыт. Харыыны эстэрээри бөртөлүөт кэтэһэ олоробут. Уу таһыма олус түргэнник үрдүүр. Чааһынан Амма сэлиэнньэтин уу ылар кутталлаах«, — диэн Амма улууһун баһылыга Николай Архипов иһитиннэрдэ.
Оттон Өнньүөс сэлиэнньэтиттэн 8 км ыраахтаах Ефремово бөһүөлэккэ 13 олорор сир ууга барбыт. «Уу таһыма бүгүн сарсыарда 2,5 миэтэрэ үрдээн 8 дьиэни муус алдьатта. Бэҕэһээ ууга барбыт дьиэлээх дьону аймахтарыгар тута көһөрбүппүт. Олус улахан хоромньу таҕыста. Олорор дьиэлэри бүтүннүү муус төгүрүйдэ. Аммалыыр суолу үрэх уута алдьатан айан суох», — диэн Өнньүөс баһылыга Мария Захарова биллэрдэ.
Амма улууһун туруга бырабыыталыстыба анал хонтуруолугар ылылынна. «Сарсыарда 11 чааска харыыны эстэрэ бөртөлүөт көппүтэ. Амма сэлиэнньэтигэр 8 дьиэ таһа ууга барда. Бологур аннынан муус хамнаан, Өнньүөскэ уу таһыма түһэрэ күүтүллэр»,- диэн Саха Өрөспүүбүлүкэтин бырабыыталыстыбатын солбуйааччыта Алексей Колодезников иһитиннэрдэ.
ВИДЕО:
Николай Попов, «Саха сирэ» хаһыат, edersaas.ru