СӨ Ыччат дьыалаларыгар уонна социальнай коммуникацияҕа министиэристибэтэ ааспыт сылга Ил Дархан гранын ылбыт куорат уонна тыа сирин социальнай-экэнэмиичэскэй сайдыытыгар ыччат бырайыактара олоххо киириилэрин бэрэбиэркэлээтилэр. Тустаах министиэристибэ үлэһиттэрэ Хаҥаласка Константин Данчинов уонна Аммаҕа Рослана Петрова үлэлэрин-хамнастарын кытта билистилэр.
Санатан суруйдахха, ааспыт сылга социальнай-экэнэмиичэскэй бырайыактары олоххо киллэриигэр Ил Дархан граныгар куонкурус биллэриллибитэ. Манна 18-тан 35-гэр диэри саастаах эдэр дьон кыттыбыта. Улуустааҕы уонна өрөспүүбүлүкэтээҕи түһүмэхтэри этэҥҥэ ааһан, “Бэйэ оҥорон таһаарыыта”, “Бытовой өҥөнөн хааччыйыы” хайысхаларынан аҕыс бастыҥ бырайыактаах ыччаты талбыттара. Маныаха уопсайа 10 мөлүйүөн солкуобай көрүллүбүтэ. Онон, бу тэрээһинтэн лоп бааччы биир сыл ааспытын кэнниттэн кыайыылаахтар бырайыактарын хайдах тэриммиттэрин, үлэлэрин-хамнастарын көрө-истэ Ыччат министиэристибэтэ айаҥҥа турунна.
Амма улууһун Чакырыгар олорор Рослана Петрова Ил Дархан 1,1 мөлүйүөн солкуобай суумалаах гранын хаһаайкатынан буолар. Рослана бу харчынан “Ай-тал Уус” диэн миэбэл оҥорор мастарыскыай арынан, үлэтэ тигинэччи бара турар. Эдэр урбаанньыт кэпсииринэн, миэбэл мастарыскыайын арынар туһунан санаа Рослана кэргэнигэр киирбит. Ыал аҕа баһылыга бу иннинэ Дьокуускайга миэбэл оҥоруутугар үлэлии сылдьыбыт эбит.
Үлэтин туһунан Рослана маннык кэпсиир: “Мин Аммаҕа сакааска миэбэллэ оҥоруохха диэн кэргэммин кытта эрдэ сүбэлэспитим. Кыралаан биир дойдулаахтарбытыттан сакаас хомуйан, ону оҥорон, Дьокуускайтан ыытар этибит. Онтон улууспут дьаһалтатыттан грант туһунан истибиппит. Бастаан куонкуруһу ааспаппыт буолуо диэн санаабыппыт. Бастакы түһүмэҕи этэҥҥэ ааһан, бырайыак көмүскээн, грант хаһаайына буолбуппуттан олус үөрбүтүм. Биир ый иһигэр наадалаахпытын барытын – ыстаныактары, туттар тээбириннэри, матырыйааллары атыыласпыппыт, үлэлээн саҕалаабыппыт”.
Министиэристибэ үлэһиттэрэ аны Горнайга, Эдьигээҥҥэ, Мэҥэ Хаҥаласка, Тааттаҕа уонна Намҥа баар грант хаһаайыннарын кытта көрсүөхтэрэ, бырайыак үлэлэрин кытта билсиэхтэрэ.
Айтана Аммосова, «Саха сирэ» хаһыат, edersaas.ru