«АЛРОСА» хос салаата – Каадырдары бэлэмниир киин хампаанньаҕа үлэһиттэри бэлэмнээһини хаһыс да сылын хааччыйар. Оттон соторутааҕыттан ыла, өрөспүүбүлүкэҕэ эрэ буолбакка, бэл, Арассыыйаҕа каадырдары үөрэтэр уонна хос үөрэтэр куурустары тэрийдэ. Ол аата, Саха сирин олохтооҕо наадыйар идэтигэр үөрэнэр кыахтанна.
edersaas.ru
Каадырдары бэлэмниир киин үөрэх ханнык ньымалара уонна көрүҥнэрэ баалларын, туохха болҕомто уурулларын туһунан «АЛРОСА» АХ Каадырдары бэлэмниир киинин салайааччыта Алла Попова кэпсээтэ.
Үөрэтии хаачыстыбалаах буоларыгар кыһаллабыт
— Алла Сергеевна, «АЛРОСА» каадырдары үксүгэр тутулуга суох, бэйэтэ бэлэмниир кыахтаах аҕыйах хампаанньалартан биирдэстэрэ буолар. Эһиги Кииҥҥит билигин тугунан дьарыктанар?
— Каадырдары бэлэмниир кииҥҥэ араас хайысханан үөрэтэллэриттэн саҕалыым. Олор ортолоругар оробуочай идэҕэ бэлэмнээһин, бырамыысыланнаска куттал суох буолуутун салаатыгар идэни үрдэтии, үлэ харыстабылыгар (охрана труда) үөрэтии баар. Ону сэргэ, Мииринэйгэ, Удачнайга, Ленскэйгэ уонна Айхалга үөрэх былаһааккалара үлэлииллэр. Былырыын Киин салайааччылары уонна исписэлиистэри бэлэмнээһин бырагырааматынан – 13 тыһыынча кэриҥэ, оттон оробуочайдары бэлэмнээһиҥҥэ 8 тыһыынчаттан тахса киһини үөрэппитэ. 2019 сылга Кииҥҥэ 22,5 тыһыынча кэриҥэ киһи үөрэннэ.
Бырайыакпытынан, биһиэхэ ким баҕалаах үөрэниэн сөп. Онуоха кини Каадырдары бэлэмниир кииммитигэр кэлиэн эрэ наада. Манна оробуочай идэҕэ (араас көҥүллэри уонна инструктажтары киллэрэн туран) үөрэтии уонна саҥа сатабыллары, компетенциялары сайыннарыы бырагыраамаларын талан биэриэхтэрэ. Бырамыысыланнаска куттал суох буолуутугар уонна үлэ харыстабылыгар үөрэтии атын блокка киирэр. Тоһоҕолоон эттэххэ, биһиги биирдиилээн дьону уонна тэрилтэлэри кытары үлэлиибит.
Каадырдары бэлэмниир кииҥҥэ үөрэх аныгы ньымалара уонна көрүҥнэрэ туһаныллаллар. Былырыыҥҥыттан ыла үгүс хайысха онлайн-көрүҥүнэн ыытыллар. Кэм-кэрдии көрдөрбүтүнэн, ити ырааҕы өтө көрөр быһаарыы этэ. Биһиги үлэбит сорох хайысхаларыгар хос уларыйыы барбытын да иһин, уруккубут курдук, үлэһити бэлэмнээһин хаачыстыбалаах буоларыгар кыһаллабыт. Ол иһин, араас идэлээх оробуочайдар ортолоругар идэҕэ маастарыстыба куонкурустарын тиһигин быспакка ыытабыт.
Хампаанньалар наадыйыыларынан үлэлиибит
— Үөрэх сүрүн хайысхаларын туһунан кэпсиэҥ дуо?
— Барыта биэс сүрүн хайысхалаахпыт. Эрдэ бэлиэтээн эппитим курдук, олортон сүрүннэрэ – салайааччылары уонна исписэлиистэри, оробуочайдары бэлэмнээһин, бырамыысыланнаска куттал суох буолуутугар идэни үрдэтии уонна үлэ харыстабылыгар үөрэтии. Холобур, салайааччылары уонна исписэлиистэри бырагыраамаларынан идэлэрин үрдэтэбит уонна эбии үөрэтиини ыытабыт. Оттон куурустар туһунан этэр буоллахха, маркшейдерскай дьыалаттан саҕалаан, Microsoft бырагыраамаларын баһылааһыҥҥа тиийэ араас хайысхалар оҥоһулуннулар. Ону сэргэ, Саха сирин уонна Арассыыйа сиригэр-уотугар үлэлиир атын хампаанньалартан сайаапкалары ылабыт. Биһиги ханнык баҕарар тэрилтэ чопчу сакааһынан үөрэҕи тэрийэр кыахтаахпыт. Онуоха үөрэх бырагыраамаларын оҥорор үөрэхтээһини сайыннарар отделлаахпыт. Бэйэбитигэр штакка баар үлэһиттэрбит ортолоруттан преподавателлары талар кыахпыт суох буоллаҕына, «АЛРОСА» хампаанньаларын бөлөҕүн оҥорон таһаарар эбийиэктэригэр үлэлээбит үөрүйэхтээх исписэлиистэри штаты таһынан преподавателлар быһыытынан, ылабыт.
Каадырдары бэлэмниир кииммитигэр бэйэҕит үлэһиттэргитин үөрэттэрэ ыытыаххытын баҕардаххытына, 8-914-252-17-07 төлөпүөҥҥэ эрийиэххитин эбэтэр CPK@alrosa.ru электроннай почтаҕа сайаапкаларгытын ыытыаххытын сөп. Кыра быһаарыы: биһиги кылгас кэмнээх сэминээрдэргэ баҕалаахтары барыларын ылыахпытын сөп буоллаҕына, идэҕэ хос үөрэтиигэ тустаах үөрэхтээҕин туһунан докумуоннаахтары эрэ ылабыт.
Биһиги куурустарбыт туһунан наадалаах иһитиннэриилэр http://cpk-alrosa.ru саайтка, ону сэргэ, Инстаграмм@alrosa_cpk страницатыгар бааллар. Манна бэйэбит үлэбитин кэпсиибит уонна бу кэмнэргэ үөскээбит этиилэрбитин билиһиннэрэбит.
Кииммит 150-тан тахса идэҕэ үөрэтэрин туһунан бэлиэтээн этиэм этэ. Биһиги үлэһиттэрбит үөрэх ханнык баҕарар кууруһун таларгытыгар үөрэ-көтө көмөлөһүөхтэрэ.
– Киин көмөтүнэн “узкай” идэни талыахха сөп дуо?
– Биллэн турар, талыахха сөп. Каадырдары бэлэмниир киин сэдэх идэлэргэ үөрэтэр. Холобур, быйыл Ньурбатааҕы хайа-байытар кэмбинээти кытары “Машинист паровой передвижной парогенераторной установки» бырагыраамаҕа үлэлиибит, Бүлүүтээҕи ГРЭС-кэ «Машинист каротажной станции» бырагыраамаҕа оробуочайдары уо.д.а. үөрэттибит. Ону тэҥэ, «Электролизник водных растворов» уонна «Отбор, анализ проб газа воздушной среды переносимым газоанализатором» курдук, сэдэх идэлэргэ үөрэппиппит. Оттон оробуочай хайысхаларга олус наадалаах идэлэр уларыйбаттар. Онно буурдуур тэрил, тиэйэр-таһар-тириэрдэр массыына, сир аннынааҕы бэйэтэ хаамар массыыналар машинистара киирсэллэр. Кэнники сылларга технологическай тырааныспары кытта сибээстээх хайысха – Caterpillar 777 карьер самосвалларын суоппардарыгар үөрэнии олус наадалаах буолла.
Корпоративнай университет
— Хампаанньа Корпоративнай университета тугунан дьарыктанарый?
— Каадырдары бэлэмниир киин базатыгар «АЛРОСА» Корпоративнай университета тэриллибитэ. Университет үрдүкү, ортоку уонна начаалынай звено салайааччыларын үөрэтэр хайысхалаах.
«Достояние «АЛРОСА» бырагыраама начаалынай звено салайааччыларын (отделлар, сыахтар начаалынньыктарын) сайыннарар аналлаах. Дириэктэрдэргэ уонна кинилэр солбуйааччыларыгар (ортоку звено) – «Лидеры «АЛРОСА», топ-менеджердэргэ «ТОП-25» бырагыраамалар бааллар.
Быйылгыттан ыла өссө биир хайысханы – линейнэй персонал исписэлиистэрин сайыннарыынан дьарыктанар «Актив «АЛРОСА» үлэлэттибит. Ураты болҕомто эдэр исписэлиистэргэ уурулунна. Кинилэргэ анаан оҥоһуллубут «Потенциал «АЛРОСА» бырагырааманан быйыл номнуо үһүс түһүмэх үөрэнэр.
Иһинээҕи тренердэр институттара
— Алла Сергеевна, өссө биир саҥаны киллэриигитинэн иһинээҕи трнередэр институттара буолар. Бу туох бырайыагый?
— Ааспыт сылтан ыла, Киин иһинээҕи тренердэри сайыннарыы бырайыагын олоххо киллэрэр. Бу бырайыак көмөтүнэн актыыпка hard&softskills сайыннарыыга трениннэри ыытар алта үлэһит баар буолла.
Иһинээҕи тренердэр институттара – үгүс үөрүйэхтээх уонна дириҥ билиилээх, эксперт үлэһиттэри бэлэмнээһин уонна сайыннарыы корпоративнай бырагыраамата. Бырагыраама хампаанньа үлэлиир сиригэр-уотугар барытыгар экспертнэй билиини илдьэ хаалар, киэҥ хабаанныыр уонна тарҕатар туһугар оҥоһулунна.
Бырагыраама үлэтин саҕалаабытыгар тренердэртэн 33 сайаапка киирбитэ. Ол түмүгэр биһиги алтаны талбыппыт. Тренердэр производствоҕа үлэлэрин преподаватель идэтигэр уларытан, үөрэтии интэриэһинэй көрүҥнэрин булуунан дьарыктанан барбыттара.
Институт үлэтин бастакы долгуна бырамыысыланнаска куттал суох буолуутун култууратын оҥорууга хайысхаламмыта. Онуоха иһинээҕи тренердэр чопчу бу хайысханан талыллыбыттара. Билигин кинилэр функциялара кэҥээтэ, кинилэр бэйэлэрин билиилэрин биэрэргэ, араас эйгэҕэ үөрэтэр матырыйааллары оҥорорго этиилэри киллэрэллэр.
Уопсайынан, туһалааҕын номнуо көрдөрбүт иһинээҕи тренердэр институттарын тэрийии устуоруйата, хас биирдии улахан хампаанньа бэйэ үөрэниитигэр көһөргө дьулуһарын кытта сибээстээх. «АЛРОСА» үлэҕэ баай уопуту мунньунна, биһиэхэ улахан үөрүйэхтээх, үрдүк таһымнаах каадырдар үлэлииллэр. Кинилэр үөрүйэхтэрин үллэстибэт сыыһа буолуо. Ону таһынан, быраактыка көрдөрбүтүнэн, биир идэлээҕиҥ интэриэһинэй көрүҥү туһанан биэрэр матырыйаала лиэксийэтээҕэр ордук өйдөнүмтүө буолар. Атын дьону үөрэтии тренердэр бэйэлэрин үөрүйэхтэрин сайыннаралларын көҕүлүүрэ дакаастанна.
Биһиги инники былааннарбыт олус элбэхтэр. Сыалбыт-сорукпут – үлэһиттэрбитигэр наадалаах элбэх билиини уонна үөрүйэҕи толору биэрии. Ким сайдыан-үүнүөн баҕарар, биһиги Кииммитигэр эрэллээхтик кэлиэххитин сөп. Саҥа саҕахтары арыйаргытыгар наадалаах билиини барытын биһигиттэн ылыаххыт.
Анастасия МОСКВИТИНА суруйуута,
Надежда ЕГОРОВА тылбааһа, «Саха сирэ» хаһыат, edersaas.ru