«АЛРОСА» АХ хос тэрилтэтэ – “Анаабыр алмаастара” аахсыйалаахтар уопсастыбалара Саха сирин хотугулуу—арҕаа эҥээрин бытархай алмаастаах сиригэр алмааһы сууйуу үлэтинэн дьарыктанар. Оттон сууйуу сезона хампаанньа бириискэлэригэр бу дьыл ыам ыйын 22 күнүгэр саҕаламмыта.
edersaas.ru
«Төһө да уустуктар баалларын иһин, биһиги оҥорон таһаарыы үлэтин сөпкө тэрийэр кыахтанныбыт. Быйылгы, 2020 сыллааҕы, сууйуу сезонугар киэҥ хабааннаах бэлэмнэнэр үлэ эрдэттэн ыытыллыбыта. 2019 сыл күһүнүттэн бу сааскы диэри уопсайа 6 714 тыһыынча куб. м кээмэйдээх хайа маассата таҥастанан, 3 636 тыһыынча куб. м алмаас кыырпахтаах кумах сууйууга анаан бэлэмнэннэ, 2 060 тыһыынча куб.м хайа-технологическай тутууга (сооружение) кутулунна. Хампаанньа үлэлээн кэлбит 20 сыллаах баай устуоруйатыгар курдук, бу ситиһиллибит үлэ барыта идэлэригэр таһымнаах, бэриниилээх дьон күүстээх хамаандатынан, тэрээһиннээх үлэнэн, үлэлээн кэлбит баай уопут түмүгүнэн ситиһилиннэ. Бары бүттүүн күүспүтүн түмнэхпитинэ, ханнык баҕарар туруоруллубут сыалы-соругу толору ситиһиэхпит, оттон бииргэ буолуу, күүстээх санаа уонна инникини эрэллээхтик көрүү биһиэхэ тирэх буолуохтара диэн саарбахтаабаппын», – диэн этэр “АЛРОСА” АХ хос тэрилтэтэ – “Анаабыр алмаастара” АУо генеральнай дириэктэрэ Павел Маринычев.
Ити курдук, үлэлээн-хамсаан хампаанньа быйылгы сезон устата 3,3 мөлүйүөн тахса караат алмааһы уонна 100 киилэ алмаас аргыһа күндү тимирдэри хостуур былааннаах. Сезон үлэтигэр бэлэмнэнии чэрчитинэн, бириискэҕэ 50 тыһыынча туоннаттан тахса ыйааһыннаах уматык-самааска матырыйаала, тиэхиньикэ уонна атын табаарынай-материальнай сыаннас аҕалыллыбыт. «Маят» бириискэтин Эбэлээх-Гусинай учаастагар 92 миэстэлээх дьон олорор уопсай дьиэтэ тутуллан үлэҕэ киирбит. Быйылгы сезон үлэтэ лаппа табыгастаах буоларын туһугар баахта бөһүөлэктэригэр үлэлиир остолобуойдар аһылыктарын диета сүбэлэрин уонна үлэһиттэр баҕаларын учуоттаан туран, көннөрөн, тупсаран биэрбиттэр. Алмаас хампаанньа хамсык инфекцията быыһылаан киирбэтин диэн, хас саҥа кэлэр баахта дьонун олоччу тестээн, бэрэбиэркэлээн эрэ баран аҕалар олус сөптөөх быһаарыыны ылыммыт. Барыта этэҥҥэ буолуохтун!
Кырдьыга да, АЛРОСА хампаанньа, ол иһигэр кини бөлөҕөр киирсэр хос-тэрилтэлэр, хайдах-туох үлэлииллэриттэн, кинилэр үлэлэрэ-хамнастара төһө ситиһиилээх, түмүктээх буоларыттан Саха сирин хас биирдии олохтооҕун олоҕун уйгута, хааччыллыыта тутулуктаах. Бары да бэркэ билэргит курдук, өрөспүүбүлүкэҕэ нолуок төлөһөр хампаанньалартан АЛРОСА – биир бөдөҥнөрө. Олохтоох бүддьүөккэ киллэрэр нолуогун кээмэйэ хомуллар бүттүүн нолуок аҥаарын кэриҥэ өлүүскэтин ылар. Хампаанньа сыл аайы айылҕа уонна экология харыстабылыгар – 6 миллиард солкуобай кэриҥэ үбү, оттон социальнай бырагыраамаларга букатын да 10 миллиард солкуобайга тиийэ үбүнэн көмөлөһөр сүҥкэн суолталаах тэрилтэ диэн туран, ситиһиилэри, араас моһолу этэҥҥэ туораан, өрөспүүбүлүкэҕэ көмөтө-ньымата үксүү, элбии турдун!
Надежда ЕГОРОВА бэлэмнээтэ, «Саха сирэ», edersaas.ru