«АЛРОСА» Саха сирин олохтоохторугар кэрэ-бэлиэ бэлэҕэ

Бөлөххө киир:

Муус устар 27 күнүгэр, Саха Өрөспүүбүлүкэтин күнүгэр, Нам сэлиэнньэтигэр Култуура уонна духуобунай сайдыы дыбарыаһын акылаата түстэ.

edersaas.ru

Саҥа эбийиэк өрөспүүбүлүкэҕэ социальнай бырайыактары олоххо киллэрэргэ “АЛРОСА” АК (ПАО) СӨ Үүнэр көлүөнэтин пуондатын нөҥүө биэрэр үбүн суотугар тутуллуоҕа. Эбийиэк суумата 450 мөлүйүөн солкуобайынан сыаналанар.

Өрөспүүбүлүкэ Ил Дархана Айсен Николаев сорудаҕынан, СӨ Үүнэр көлүөнэ тус сыаллаах пуондата бырайыагы, социальнай эбийиэктэри тутуу уонна М.К.Аммосов төрөөбүтэ 125 сылын бырааһынньыктааһын дьаһалларын быһыытынан, олоххо киллэриэҕэ.

Нам улууһун дьаһалтатын баһылыга Юрий Слепцов Нам улууһун олохтоохторун ааттарыттан өрөспүүбүлүкэ баһылыга Айсен Николаевка, Сергей Иванов генеральнай дириэктэрдээх АЛРОСА хампаанньаҕа уонна бырайыагы олоххо киллэрээччилэргэ махтанна. Кини өссө 2010 сыллаахха, Нам улууһун олохтоохторо сааскы халаан содулуттан улаханнык эмсэҕэлээбиттэригэр, “АЛРОСА” АК биир бастакынан саахалы туоратар, чөлүгэр түһэрэр үлэлэри үбүлээһиҥҥэ улахан көмөнү оҥорбутун санатта. Ол курдук, АЛРОСА үбүгэр 10 саҥа олорор дьиэ уонна Граф биэрэгэ сэлиэнньэҕэ киирэр суол муостата тутуллубуттара. Баһылык хампаанньа тугунан да сыаналаммат улахан көмөнү оҥорбутун уонна үтүө дьыалатын улуус нэһилиэнньэтэ билиҥҥэ диэри саныырын бэлиэтээтэ уонна халаан содулун туоратыыга көмөтүн иһин ис сүрэҕиттэн махтанна. Улуус олохтоохторо махталларын бэлиэтигэр Граф биэрэгэр тутуллубут саҥа дьиэлэри хампаанньа чиэһигэр “АЛРОСА” кыбаарталынан” ааттаабыттар.

Ити сыл “АЛРОСА-Ньурба” хампаанньа Саха сирин уһулуччулаах судаарыстыбаннай уонна бэлитиичэскэй диэйэтэлэ Илья Егорович Винокуров аатынан Хатыҥ Арыытааҕы устуоруйа-кыраайы үөрэтэр мусуой саҥа дьиэтин тутууну үбүлээбитэ.

Нам улууһун олохтоохторо өр күүппүт, улууска култуура-духуобунас сайдыытын киининэн буолуохтаах саҥа эбийиэктэрин сыбаайата 2020 сылга чопчу Өрөспүүбүлүкэ күнүгэр түһэриллибитэ кэрэхсэбиллээҕин бэлиэтииллэр.

Эбийиэги “РДР Групп” ХЭО хампаанньа тутуоҕа. Бастакы сыбаайа ааспыт үйэ ортотугар тутуллубут эргэ дьиэ оннугар уурулунна. Нам улууһугар баара-суоҕа икки сылынан 5 692 кв.миэтэрэ уопсай иэннээх, үс мэндиэмэннээх Култуура дыбарыаһа дьэндэйиэҕэ. Манна 400 миэстэлээх аныгы көрөр саала уонна икки бибилэтиэкэ баар буолуохтара. Эбийиэк 2022 сыл 3 кыбартаалыгар, Нам сирин уһулуччулаах уолун, бэлитиичэскэй уонна уопсастыбаннай диэйэтэл, Саха сирин судаарыстыбаннаһын төрүттээччилэртэн биирдэстэрэ Максим Аммосов үбүлүөйүн көрсө – Саха Өрөспүүбүлүкэтин 100 сылыгар олоххо киирэрэ уонна улуус олохтоохторугар эрэ буолбакка, өрөспүүбүлүкэ бары олохтоохторугар кэрэ-бэлиэ бэлэҕинэн буолара былааннанар.

“Саха сирэ” хаһыакка, edersaas.ru саайтка

анаан Яна БАЙГОЖАЕВА.

+1
0
+1
0
+1
0
+1
0
+1
0
+1
0
+1
0