Алексей Стручков Дьокуускай таһынааҕы сэлиэнньэлэргэ бырабыыталыстыба отчуотун туруорда
Саха сирин Бырабыыталыстыбатын бэрэссэдээтэлин бастакы солбуйааччы Алексей Стручков кулун тутар 12 күнүгэр былаас ситэриилээх уорганнарын үлэлэрин отчуотун Дьокуускай таһынааҕы сэлиэнньэлэргэ туруорда: Хатас, Пригороднай, Табаҕа сэлиэнньэлэригэр.
Отчуот иннинэ Алексей Стручков Хатаска кытыл таһынааҕы балаһаны көрдө. Биэрэк сууллуута балаһа үрдүгэр турар Каландаришвили уулуссатын кэтэх ыалларын дьиэлэригэр кутталы үөскэтэр. Онон манна кытылы бөҕөргөтөр үлэлэри ыытыы ирдэнэр.
Бастакы вице-премьер билигин 7 №-дээх Оҕо-спортивнай оскуолата үлэлиир Оҕо искусствотын мас дьиэтигэр таарыйда. Бу оскуола 2003 с. аһыллыбыта уонна 1987 сыллааҕы тутуу ааркалыы быһыылаах спорт саалатыгар үлэлээбитэ эрээри, дьиэ 2016 с. умайбыта. Билигин секциялар Оҕо искусствотын дьиэтин актовай саалатыгар, оттон остуол тенниһигэр уонна волейболга секциялар Хатас спортивнай саалатыгар ыытыллаллар. Онон 7 №-дээх спорт оскуолатын кэлэктиибэ саҥа спорт саалатын тутууну туруорсар.
Ити кэнниттэн Алексей Стручков “Тускул” култуура дьиэтигэр өрөспүүбүлүкэ ааспыт сыллааҕы үлэтин, 2019 сыллааҕы уонна уһун болдьохтоох соруктар тустарынан отчуоттаата.
Алексей Стручков киирии тылыгар сыл түмүктэрин көрдөрүүлэригэр, саҥа социальнай эбийиэктэри уонна олорор дьиэ фондатын тутууну, тыа уонна куорат сирин тупсаҕай оҥоруу, тыа хаһаайыстыбатын уо.д.а. туһунан иһитиннэрдэ.
2019 сыл соруктарыгар тохтууругар Алексей Стручков өрөспүүбүлүкэ бырабыыталыстыбата Арассыыйа Бэрэсидьиэнэ Владимир Путин ыам ыйынааҕы ыйааҕар этиллибит национальнай бырайыактары олоххо киллэриигэ үлэлииллэрин ыйда.
Отчуот кэнниттэн Дьокуускай таһынааҕы нэһилиэктэр олохтоохторо ыйытыылары биэрдилэр, этиилэри киллэрдилэр.
Хатас олохтоохторун биэрэги бөҕөргөтүү, суолу оҥоруу, агропромышленнай комплексы өйөөһүн туһунан боппуруостар долгуталлар.
Хатас волейболга кулуубун бэрэстэбиитэлэ Геннадий Керегяев спорт саалата хаһан тутулларын туоһуласта. Алексей Стручков бүгүн спорт саалатын тутуу бырайыага-сметата судаарыстыбаннай чинчийиини ааһарын эттэ. Тутууну 2020 сылга былаанныыллар.
Георгий Иванов Покровскай аартыгынааҕы ГАИ поһуттан Хатаска киириигэ диэри суол учаастагар суол бэлиэлэрин туруорууну уонна уулуссаны сырдатыыны туруоруста. Хатаска уулусса-суол тиһигин өрөмүөнэ 2020 сылга саҕаланыахтаах.
Табаҕалар Интэриниэти холбооһун уонна халааны этэҥҥэ аһарыы туһунан ыйыттылар.
Пригороднай олохтоохторун 12 №-дээх оскуола дьиэтигэр салҕааһыны тутуу, элбэх өҥөнү оҥорор административнай киин уонна учаастактааҕы балыыһа кыһалҕалара интэриэһиргэтэр. “Билигин балыыһа сэлиэнньэ дьаһалтатын дьиэтигэр үлэлиир, кыараҕас кэбиниэттэр уонна хостор табыгаһа суохтар”, — диэн олохтоохтор бэлиэтииллэр.
Киирбит ыйытыылары барытын боротокуолга киллэрдилэр.
Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата