Өлүөхүмэҕэ 90 саастаах биллиилээх оҕуруотчут, ыанньыксыт Александра Сафонованы чиэстээтилэр
Өлүөхүмэ сэлиэнньэтин олохтооҕо ааспыт сылларга бастаан “Правда” холкуоска, онтон “Өлүөхүмэ” сопхуоска өлгөм илиилээх оҕуруотчут, үрүҥ илгэни дэлэтээччи ыанньыксыт быһыытынан биллибит Александра Сафонова бу күннэргэ 90 сааһын томтойо туолла.
Александра Семеновна тыыл уонна үлэ бэтэрээнэ, “1941-1945 сс. Аҕа дойду Улуу сэриитигэр килбиэннээх” үлэтин иһин мэтээл кавалера, коммунистическай үлэ ударнига, “Саха сирин тыатын хаһаайыстыбатын бэтэрээнэ”, “Улуус сайдыытыгар киллэрбит кылаатын иһин” бочуоттаах бэлиэлэр хаһаайкалара. Икки кыыһын уонна сиэннэрин, хос сиэннэрин тапталларыгар, бар дьонун ытыктабылларыгар угуттанан олорор.
Ытык кырдьаҕаһы үөрүүлээх үбүлүөйүнэн улуус баһылыгын солбуйааччы Оксана Саввинова, улуустааҕы социальнай бэлиитикэ управлениетын начальнига Анна Мамонтова, Бэтээрэннэр сэбиэттэрин бэрэссэдээтэллэрэ Лилия Арифулина, «Кладовая Олекмы» ААУо салайааччылара Василий Сафонов, Сергей Несмелов, Мария Янкова, нэһилиэк баһылыга Лидия Семенова, «Рябинушка» ансаамбыл ырыаһыттара эҕэрдэлээтилэр.
«Саха сирэ» хаһыакка, edersaas.ru саайтка анаан
Өлүөхүмэттэн Валерий Малышев.