Өрөспүүбүлүкэҕэ коронавирустан 10 киһи үтүөрбүтүн, ол эрээри, балаһыанньа эмискэ уустугурбутун туһунан СӨ Ил Дархана Айсен Николаев муус устар 10 күнүгэр сарсыарда 11 чаастааҕы брифинигэр иһитиннэрдэ.
edersaas.ru
— Бэҕэһээ Ленскэй уонна Алдан улуустарыгар коронавирус инфекциятыгар сабаҕаланар дьон бааллара биллибитэ. Ленскэй оройуонун киһитэ Арменияттан кэлбит, РФ олохтооҕо. Кини кэлэрин кытта, кэргэниниин “самоизоляцияҕа” ыытыллыбыттара. Кэргэнниилэр барыллаан анаалыстара бэҕэһээ “положительнайы” көрдөрдө. Хантаактаспыт дьонноро бары булулуннулар, наадалаах анаалыстар ылыллан бүтэн эрэллэр. Онон, бүгүн киэһэ хантаактаспыт дьон анаалыһа номнуо биллиэҕэр эрэнэбит. Хантаактаспыт дьон сорохторун анаалыһа “отрицательнайы” көрдөрдүлэр. Манна даҕатан эттэххэ, мин бэҕэһээ Ленскэй улууһун дьаһалтатын кытары видео-кэмпириэнсийэ ыыппытым кэнниттэн, дьаһаллары кэмигэр ыллылар.
Оттон Алдан улууһугар балаһыанньа, мин көрөрбүнэн, олус кутталлаах. Киргизия дьоно кэргэнниилэр, Алдаҥҥа олорбуттара ырааппыт. Москваҕа биир ый устата эмтэнэн баран кэллилэр. Кинилэр Алдаҥҥа кэлбиттэригэр дьиэттэн тахсыбат эрэһиимҥэ ыытыллыбыттара. Ол гынан баран, тустаах иһитиннэрии киирбитинэн, кэргэнниилэртэн биирдэстэрэ эрэһиими кэһэн, Алдан киин ырыынагар сырытта. Ону видеонан кэтээн көрүү бигэргэттэ. Кэргэнниилэр иккиэн ырыынак үлэһиттэрэ буолалларын учуоттаан, бу кэмҥэ ырыынакка сылдьыбыт дьоҥҥо улахан кутталы үөскэтэллэр. Мин улуус баһылыгар ырыынагы суһаллык сабар туһунан дьаһаллары ылына охсоллоругар сорудахтаатым. Ол эрээри, Алдан улууһугар бытааннык дьаһаналлара көһүннэ. Бүгүн 11 чааска диэри ырыынагы сабар туһунан быһаарыыны билиҥҥитэ ылына иликтэр…”, – диэн бүгүҥҥү уустук балаһыанньа туһунан иһитиннэрдэ.
Надежда ЕГОРОВА, “Саха сирэ” хаһыат, edersaas.ru