Соторутааҕыта АККОР бэрэсидьиэнинэн талыллыбыт “Туймаада” хампаанньа генеральнай дириэктэрин солбуйааччы Александр Артемьев сырыытын Уус Маайаттан саҕалаата. Ол кэккэ төрүөттэрдээх. edersaas.ru
Бастатан, охтон баран кыайан турбакка көлөттөн сытар сүөһүнү санатар тыа хаһаайыстыбалаах улууска судаарыстыба өйөбүлүнэн туһаныы төрүкү сэмэй эбит. Киирсэн көрөргө холонооччу даҕаны аҕыйах. Быйыл соҕотох Н.П.Абрамова “Саҕалааччы фермер” тус сыаллаах бырагыраама куонкуруһугар кыттыбыт эрээри, сүүмэрдээһини кыайан ааспатах. Александр Еремеевич ол иһин министиэристибэ иһинэн үлэлиир АПК сүбэлиир-методологическай кииниттэн исписэлиис Гаврил Дранаевы анаан-минээн илдьэ тиийэн, үлэлиэн-хамныан баҕалаах дьоҥҥо сүбэ-соргу бэрдэрдэ.
Иккиһинэн, Уус Маайа киин сирдиин сайыннары сылдьыһар таас суолланара адьас чугаһаан турар. Суол оҥорооччулар бэйэлэрэ этэллэринэн, аҕыс биэрэстэ хаалбытын аны сайын ситэрдэхтэринэ, үлэ түмүктэниэхтээх. Оччоҕуна “суолбут суох” диэн сылтах умнуллуо. “Уус Маайаттан ордук минньигэс хортуоппуйдаах сири билбэппин”, — диир Александр Еремеевич уонна хортуоппуйу үүннэриигэ улуус бааһынайдара күүскэ туруналларыгар сорук туруорар. Билигин улуус кэтэх уонна бааһынай хаһаайыстыбалара 1766,9 туонна хортуоппуйу үүннэрэллэр. Үүнүү кээмэйин улаатыннардахтарына, соҕотуопка уонна батарыы кыһалҕалара тириэхтэрэ. Маныаха А.Артемьев анаан дьарыктанар кэпэрэтиип тэриллиэхтээҕин ыйар уонна 500 туонна хортуоппуйу уурар-харайар эбийиэк тутуллуон сөбүн этэр.
Үсүһүнэн, Уус Маайа улууһа кэтэх дьиэни тутууга “Туймаада” хампаанньа биэрбит бырыһыана суох уһун болдьохтоох кирэдьиититтэн 2017 сыл 11 ыйын түмүгүнэн 708 тыһ. солк. харчыны төннөрөн, 56 бырыһыан төлөһөн иһэрэ – орто көрдөрүүттэн (60%) намыһаҕын быһыытынан, генеральнай дириэктэри солбуйааччы улуус дьаһалтатын баһылыгар Сөбүлэһиигэ илии баттатта. “Эһиги сыл түмүгүнэн 85 бырыһыанын төннөрөрү ситиһиҥ, оччоҕуна эһиил иэс биэрии кээмэйин 5 мөл. солкуобайга диэри улаатыннарыахпыт”, — диэтэ Александр Артемьев итиэннэ киин улуустарга сорох нэһилиэктэр 10 мөлүйүөҥҥэ тиийэ сууманы ылалларын холобурдаата. Быйыл Уус Маайаттан 3 ыал ортотунан 500-түү тыһ. солкуобайы иэс ылбыт. Онон хампаанньа этиитэ хаалыылаах улууска барыстаах эрэ буолуон сөп.
Василий НИКИФОРОВ, «Саха сирэ» хаһыат, edersaas.ru