Саха бааһынайдара АККОР үбүлүөйдээх сийиэһигэр сылдьаллар. Арассыыйаҕа бааһынай хамсааһына тэриллибитэ быйыл отут сылын туоларынан сибээстээн, бэҕэһээ Москваҕа бааһынай хаһаайыстыбалар ассоциацияларын (АККОР) XXX сийиэһэ үлэтин саҕалаата.
edersaas.ru
Дойду 70 эрэгийиэнин түмпүт бу дьоһун тэрээһиҥҥэ Саха Өрөспүүбүлүкэтиттэн тыа хаһаайыстыбатын миниистирэ Александр Атласов салайааччылаах улахан дэлэгээссийэ кыттар. Сийиэскэ АПК эйгэтигэр хаһаайыннааһын дьоҕус киэбин салгыы сайыннарыы, бааһынай хамсааһынын оруолун үрдэтии, тыа сиригэр оҥорон таһаарар үлэни-хамнаһы тэрийии, “Бааһынай хаһаайыстыбалары өйөөһүн ситимин тэрийии итиэннэ тыа сирин кэпэрээссийэтин сайыннарыы” федеральнай бырайыагы олоххо киллэрии тула киэҥ кэпсэтии ыытыллар.
— Биһиги өрөспүүбүлүкэбит бааһынайдарын үлэлэрин-хамнастарын дойду салалтата сиэрдээхтик билинэр, — диир бааһынай хаһаайыстыбалар ассоциацияларын Саха сиринээҕи салаатын бэрэсидьиэнэ Александр Артемьев. – Ол курдук, АККОР салаалара уон аҕыс улууска уонна Дьокуускай к. үлэлиир, 1 тыһ. 170 бааһынай хаһаайыстыбатын, ТХПК-лары түмэр, Статистика чахчыта көрдөрөрүнэн, өрөспүүбүлүкэ үрдүнэн 2 тыһ. 408 фермер, 25 кирэдьииттиир кэпэрэтиип уонна 326 ТХПК баар. Кинилэр өрөспүүбүлүкэ экэниэмикэтигэр сүҥкэн кылааттарын киллэрэллэр.
Раиса Сибирякова, «Саха сирэ» хаһыат, edersaas.ru
