Күүттэриилээх “яКҮҮТия”

Бөлөххө киир:

“Якутия” авиахампаанньа рейстэрэ тардыллар буолбуттара быданнаата. Тардыллыыны билбэккэ хаалбыт дьон, пуорка эрдэ кэлэн хаалан, көтүөх иннинэ сылайаллар-элэйэллэр. Суһал наадаҕа, эмтэнэ, үлэлии, үөрэнэ, сынньана, күүлэйдии барар-кэлэр дьон сыралара-сылбалара баранан, тустаах сирдэригэр бэрт эрэйдээхтик айаннаан тиийбиттэрин туһунан олус элбэхтэ аахтыбыт, иһиттибит. Бэл, дьон номнуо “яКҮҮТия” диэн аатыгар да сурулла сылдьар, күүттэриилээх “яКҮҮТия” диэн ааттыы оҕуста.

Табыллыбатах күүлэй

Соторутааҕыта билэр дьонум Сочига сынньана көтөөрүлэр мучумааннаммыттарын туһунан кэпсээбиттэрэ. “Якутия” хампаанньаттан билиэт ылан, хас эмит сыл ыра санаалара буолбут Сочига сынньана барар буолбуттар.

Тыаттан кэлбит саастаах дьону сиэннэрэ, хата, төлөпүөн нөҥүө рейстэригэр регистрациялаан биэрбит. Онон, пуорка, урукку курдук, икки чаас иннинэ киирбэтэхтэр. Онлайн-регистрацияламмыт дьон, пуорка киирэн чаас буолбуттар дуу, суох дуу, тута сөмөлүөккэ олорбуттар. “Хампаанньабыт сайдыы бөҕөтө буолбут эбит” диэн үөрэн-көтөн, Дьокуускайтан уһатыыта-кэҥэтиитэ суох көппүттэр. Сөмөлүөттэрэ Москванан түһэн ааһар, онно сапыраапкаланар эбит. Сапыраапкаланабыт диэн пассажирдары пуорка түһэртээн баран, арай, доҕор, 22 чаас күүттэрбэтэхтэр дуо? “Бу кэлиэ, ити кэлиэ” диэбит курдук, үстэ-түөртэ күүттэрэн, тардыллан, эт киһи элэйбитин, сыа киһи сылайбытын кэнниттэн, дьэ, сөмөлүөттэригэр олордубуттар. Саастаах дьон бу күүттэрииттэн систэрэ быстан, атахтара ыалдьан, дабылыанньалара тахсан, баҕалаах Сочиларыгар тиийэн сүгүн сынньамматахтарын туһунан хараастан кэпсээбиттэрэ.

Хампаанньа антирейтиҥҥэ киирдэ

Росавиация дааннайдарынан, “Якутия” авиахампаанньа Арассыыйа үрдүнэн сайыҥҥы ыйдарга биир саамай рейстэрин хойутатар хампаанньанан ааттаммыта. Бу маны туоһулуур статистиканы Росавиация саайтыгар көрүөххүтүн сөп. От ыйын ылан көрдөххө, авиахампаанньа 13,99% рейсэ тардыллыбыт эбит.

Тэҥнэбилгэ

Ол курдук, “Royal Flight” хампаанньа 31 рейстэн үһүн эрэ, оттон «Полярные авиалинии», «Северный ветер» уонна «Уральские авиалинии» рейстэрин 5% хойутаппыттар.

«Северсталь» (0,13%), «Нордавиа» (0,3%), «Победа» (0,5%), «Аэрофлот» (0,66%), «Глобус» (0,76%), «Сибирь» (0,76%), «Ямал» (0,74%) уонна “Utair” (0,8%) хампаанньалар “хойутаабаттар” диэн бэлиэтэммит.

Алдьаммыт мотуордар, көппөт “Сухуойдар”

Сайын “Якутия” авиахампаанньа “Супер-джет” сөмөлүөттэрин мотуордара биир кэм алдьанан, ону сатаан уларыппакка, көтүөхтээх рейстэр тардылыннылар диэн буолбута. Дуогабар быһыытынан, кылгас кэмҥэ эргэ мотуордары уларытыахтаах французскай хампаанньа үлэтин толорботоҕо.

Бу сытыы боппуруос РФ бырабыыталыстыбатын таһымыгар быһаарыллар. Балаҕан ыйын саҕаланыыта Ил Дархан Айсен Николаев дойду бырамыысыланнаска миниистирин Денис Мантуровы кытта кэпсэппитэ.

“Арассыыйатааҕы транспортнай лизинговай хампаанньа иһинэн кылгас кэм иһигэр эргэ мотуордары уларытар, саҥардан биэрэр пуонда тэриллиэҕэ. Маны таһынан, РФ уонна «Сухой» концерн икки ардыларыгар үп-харчы өттүнэн эбии мэктиэ баар буолуоҕа. «Якутия» авиахампаанньа “Супер-джет” сөмөлүөт мотуорун уларытар курдук кыһалҕаны аны көрсүө суоҕа”,  — диэн миниистир эрэннэрбитэ.

Хоруй кэлбэтэ

“Якутия” авиахампаанньа салалтатыгар рейстэр тардыллыыларын суох гынарга туох үлэ барарын туһунан “Саха сирэ” хаһыат комментарий биэрэллэригэр көрдөһөн официальнай сурук ыыппыппыт. Салалтаҕа уларыйыыларынан сибээстээн, сурукпутугар хоруйу сатаан ыыппаттарын туһунан хампаанньа үлэһитэ биһиэхэ эттэ.

Салалтаны уларыттылар

СӨ Ил Дархана Айсен Николаев: “Хампаанньаҕа уларыйыылар буолуохтара”, — диэн эрдэ иһитиннэрбитэ. Алтынньы 10 күнүгэр түүн 03:20 чааска «Якутия» авиахампаанньа “Сухой-Супер-джет” сөмөлүөтэ 414-с рейси толоро сылдьан, Дьокуускай аэропуордугар түһээри, көтөр балаһаттан туораабыта. Сөмөлүөккэ 91 пассажиры кытта биэс экипаж чилиэнэ баар эбит. Онон сибээстээн, Дьокуускай аэропуорда быстах кэмҥэ сабылла сылдьыбыта. Бу кэмҥэ рейстэр Нерюнгри оройуонун Чульман аэропуордугар көһөрүллүбүттэрэ. Билигин «Якутск» аэропуорт үлэлии турар.

Бу быһылаан бүтэһик хааппыла буолла быһыылаах – «Якутия» авиахампаанньа генеральнай дириэктэрэ Ольга Федорова үлэлээн бүппүтүн туһунан иһитиннэрдэ. Кини дуоһунаһыгар Владимир Горбунову анаатылар диэн СӨ бырабыыталыстыбатын саайта суруйар.

Дойдубутун бэрт эрэйинэн булбуппут

Ааспыт сайын Саха тыйаатырын артыыстара Жанна Ксенофонтова уонна Айсен Лугинов Крымтан “Таврида” ыччат форумуттан кэлэн иһэн, сөмөлүөттэрин рейсэ тардыллыбыт. Бу туһунан Жанна маннык кэпсиир:

Хаһан эмит маннык быһыыга-майгыга түбэһиэм диэн санаабат даҕаны этим. Крымҥа форумҥа бараары-кэлээри алдьархайдаахтык айанаан сырыттыбыт. Бастаан Дьокуускайтан көтөөрүбүт, рейспит тардыллан хаалбыта. Екатеринбург куоракка пересадка­лаан, Москваҕа тиийиэхтээх этибит. Онон, Москвалыыр сөмөлүөппүтүн ­куоттаран кэбиспиппит. Хайыахпытый? Бэйэбит харчыбытынан билиэт атыылаһарга күһэллибиппит. Оттон Крымтан кэлиибитигэр, Читанан эргийбиппит. “Чита-Дьокуускай” хайысха рейсэ түөрт-биэс төгүл тардыллыбыта. Хаста даҕаны аэропуорка хонон, Сахабыт сирин бэрт эрэйинэн булбуппут. Билигин харчыбытын төнүннэрэллэрин ситиһэ сатыыбыт. Ыспыраапка бөҕөтүн көрдүүллэр, мачайа олус элбэх эбит.

Куонкурус биллэрилиннэ

Арассыыйа аэропуортарыгар дойдубут уһулуччулаах дьонун аатын иҥэрэргэ национальнай куонкурус биллэрилиннэ. Тэрээһин РФ Уопсастыбаннай палаататын, тыл уопсастыбатын, географическай уопсастыба уонна байыаннай-историческай уопсастыба уопсай көҕүлээһиннэринэн ыытыллар. Норуот куоластааһынын түмүгүнэн, 45 аэропуорка искусство, наука диэйэтэллэрин, култуура, бырамыысыланнас уонна экэниэмикэ сайдыытыгар үлэлэспит о.д.а. дьон аатын иҥэриэхтэрэ. Бу 45 аэропуорт иһигэр Дьокуускай пуорда эмиэ киирдэ.

“Дойдубут киэн туттар, инники күөҥҥэ илдьэ сылдьар дьоно үгүстэр. Аэропуорт нөҥүө күннэтэ мөлүйүөнүнэн киһи ааһар. Манна уһулуччулаах дьоммут ааттара иҥэрилиннэҕинэ, кинилэр тустарынан өссө элбэх киһи билиэ этэ”, — диэн РФ Уопсастыбаннай палаататын сэкирэтээрэ Валерий Фадеев этэр.

Айтана Аммосова, «Саха сирэ» хаһыат, edersaas.ru

Хаартыскалар — интэриниэттэн.

+1
0
+1
0
+1
0
+1
0
+1
0
+1
0
+1
0