Дьокуускайдааҕы «Айыы Кыһата» оскуола 7-с кылааhын үөрэнээччитэ Сандаара Апросимова соторутааҕыта Польшаҕа, Варшава куоракка ыытыллыбыт Европа эдэр ыччатын аан дойдутааҕы дуобакка чөмпүйэнээтигэр кыттан, классическай бырагыраамаҕа уонна блицка 1-кы миэстэ, түргэн бырагыраамҕа 3-с миэстэ буолла.
edersaas.ru
— Сандаара дьарыгын Оҕо дыбарыаһыгар дуобат куруһуогар саҕалаабыта. Дуобакка бастакы тириэньэринэн Аял Владимирович Саввинов буолар. Иккис сылыттан Иван Олегович Павлов дьарыктыыр. Ити бастаан Оҕо айымньытын дьиэтигэр этэ, билигин Өрөспүүбүлүкэтээҕи саахымат, дуобат киинигэр дьарыктанар.
Сандаараны 1-кы кылаастан мин үөрэппитим. 7-с кылааска диэри кылаас салайааччыта этим. Кыра кылаастарга туйгуннук үөрэммитэ, билигин аҕыйах 4-тээх. Элбэхтик күрэхтэһиилэргэ кыттар. Сэмэй, холку, дуоспуруннаах, өйдөөх, тобуллаҕас, сахалыы толкуйдаах, олус дьулуурдаах кыыс. Үөрэҕэр эппиэтинэстээхтик сыһыаннаһар. Дьоҥҥо биир тэҥ сыһыаннаах. Кылаас олоҕор көхтөөхтүк кыттар, — диэн билиһиннэрдэ Сандаара Апросимованы учуутала, “Айыы кыһатын” дириэктэрэ Лидия Петровна Шамаева.
Маннык үчүгэй, киһи киэн туттар үөрэнээччилэрдээх “Айыы кыһата”, үгүскүт билэр буолуохтаах, өр сыл кэтэһэн-кэтэһэн, дьэ быйыл 203-с микрооройуоҥҥа сиэдэрэй оҥоһуулаах саҥа таас дьиэлэннэ.
“Газэнергомонтаж” биһигини өйүүр, саҥа дьиэбитигэр киирээри бэлэмнэнэнэ сылдьабыт. Билигин “Роспотребнадзор”, “Пожнадзор” быһаарыытын, «Обрнадзор» лицензиятын ыларга үлэлэһэбит”, — диэтэ Лидия Петровна, оскуоланы ыйыталаспыппар. Билигин үөрэх кыһатын саҥа дьиэтигэр миэбэллэрин, кабинеттарын тэриллэрэ кэлэрин күүтэллэр эбит.
Биллэрин курдук, бу «Айыы Кыһатын» уонна атын да эбийиэктэри куоракка “Газэнергомонтаж” чааһынай тэрилтэ судаарыстыбаннай-чааһынай бииргэ үлэлэһии ньыматынан туппута.
Татьяна МАРКОВА, «Саха сирэ» хаһыат, edersaas.ru