Ол курдук, норуот, төрөппүттэр уопсастыбаннай түмсүүлэрин туруорсуутунан, Дьокуускай куорат олохтоох дьаһалтатын өйөбүлүнэн, 2005 сыллаахха Дьокуускайдааҕы Национальнай гимназия (дириэктэр Н.К.Чиряев) иһинэн аһыллыбыт “Айыы кыһата” оскуола саҥа дьиэтин акылаата бэҕэһээ, от ыйын 1 күнүгэр, түһэрилиннэ!
Сарсыарда 11 чаастан куорат 203-с микро-оройуонугар сахалыы таҥастарын дьоһуннаахтык кэтэн, төрөппүттэр, педагогтар, араас сыллардааҕы выпустар уонна бүгүҥҥү үөрэнээччилэр бу умнуллубат түгэҥҥэ кытта кэлбиттэр.
Үөрүүлээх, өрөгөйдөөх тэрээһиҥҥэ Дьокуускай мэрэ Айсен Николаев, Куорат Дууматын бэрэссэдээтэлэ Александр Саввинов, мэрия үлэһиттэрэ, тутааччылар кыттыыны ыллылар.
Айсен Сергеевич, бу – тутулла турар оскуолалартан саамай улаханнара уонна сыаналаахтара, ол эрээри, маннык оскуола наадатын өйдүүбүт, “Айыы кыһата” мэлдьи инники күөҥҥэ сылдьар үөрэх кыһата. Бу саҥа оскуола дьиэтэ 2019 сылга балаҕан ыйын 1 күнүгэр үлэҕэ киириэҕэ, диэн туран, “Айыы кыһата” оскуола акылаата кутуллуутун саҕалыыр бэлиэ кнопканы баттаабытын мустубут дьон уруйдаан, дохсун ытыс тыаһынан көрүстүлэр.
Бу 550 миэстэлээх, 3 мэндиэмэннээх, 2 спортивнай саалалаах, үс мэндиэмэн үрдүктээх ураһалаах, Олоҥхо саалалаах, айар үлэҕэ мастарыскыайдардаах, аактабай саалалаах, остолобуойдаах, үҥкүү саалалаах, бибилэтиэкэлээх, аныгылыы оҥоһуулаах, сахалыы тыыннаах бэртээхэй дьиэ буолуоҕа.
Лидия Петровна Шамаева, “Айыы кыһата” оскуола дириэктэрэ:
—Чахчы, күүтүүлээх-кэтэһиилээх күммүт үүннэ. Олус долгутуулаах түгэн. Ыра санаабыт туолан иһэриттэн саамай үөрбүт, астыммыт дьонунан төрөппүттэр, педагогтар буолабыт, уонна, биллэн турар, үөрэнээччилэрбит.
Бу тутуу биир уратыта диэн – бүгүн хаһан да буола илик түгэн тосхойдо—биһиги оскуолабыт Дьокуускай куорат саҥа 203-с микро-оройуонугар судаарыстыбаннай-чааһынай бииргэ үлэлээһин (партнерство) сөбүлэҥинэн тутуллуохтаах 5 оҕо тэрилтэтин тутуу төрүтүнэн буолла! Ол эбэтэр, “Айыы кыһатын” сэргэ манна салгыы 2 оҕо саада, Оҕо искусствотын оскуолата уонна оҕо бибилэтиэкэтэ тутуллуохтара. Барыта олоххо киирдэҕинэ — бүтүн оҕо куората буолуоҕа.
Дьэ, ити курдук, 12 сыл эрэнэ күүтүллүбүт үтүө күн чахчы үүннэ. Сотору кэминэн “Айыы кыһата” саҥа дыбарыаска киирэр үөрүүлээх күнэ, хонон турдахпыт аайытын, чугаһаатар-чугаһаан иһиэҕэ.
Татьяна МАРКОВА, «Саха сирэ» хаһыат, edersaas.ru