Ил Дархан Айсен Николаев Ил Түмэҥҥэ судаарыстыбаннай былаас ситэриилээх уорганнарын отчуотугар айылҕаны харыстааһын, экология боппуруостарын таарыйда.
Экология өттүнэн харысхаллаах буолар туһуттан, бырамыысыланнас үлэлиир сирдэригэр экологическай кэтээн көрүү (мониторинг) күүһүрдэ. Ааспыт сылга мониторинг көрдөрүүтэ 52%-тан 75%-ҥа диэри үрдээбит.
edersaas.ru
Өрөспүүбүлүкэ туруорсуутунан, улахан хампаанньалар үгүөрү үбү көрөр буоллулар. Холобур, “АЛРОСА” хампаанньа “Бүлүү сүнньүн улуустарын уунан хааччыйыы систиэмэтин сайыннарыы” бырагыраамаҕа сыл аайы 150 мөлүйүөн солкуобайы угар. Бырагырааманы үлэлэтэргэ Ил Түмэн этиилэрэ учуоттаммыттар – сир аннынааҕы ууну чинчийии ыытыллыбыт, 14 нэһилиэнньэлээх пууҥҥа ууну ыраастыыр ыстаансыйалар ылыллан, билигин 3 ыстаансыйа үлэлии турар.
Ону тэҥэ, Айсен Николаев бөҕү-саҕы суох гыныы, нэһилиэнньэни ыраас уунан хааччыйыы боппуруостара сытыытык туралларын бэлиэтээтэ.
— Экология өттүнэн чөл буолуу – биһиги олохпут-дьаһахпыт, доруобуйабыт чөл буолуутун мэктиэтэ, онон болҕомтобут уҕарыа суохтаах, — диэн кини эттэ.
Санатар буоллахха, Айсен Николаев Ил Дархан дуоһунаһыгар киирээт, бастакы таһаарбыт ыйааҕа экология, айылҕаны харыстааһын туһунан этэ.
Ангелина Васильева, “Саха сирэ” хаһыат, edersaas.ru