Айсен Николаев уонна Юрий Трутнев муоста тутуллуохтаах сирин көрдүлэр

Саха Өрөспүүбүлүкэтин Ил Дархана Айсен Николаев уонна РФ бэрэсидьиэнин Уһук Илин федеральнай уокуругар  боломуочуйалаах бэрэстэбиитэлэ Юрий Трутнев Өлүөнэ өрүһү торуур муоста тутуллуохтаах сирин көрөн кэллилэр. Ил Дархан Юрий Трутневка муоста хаһан, хайдах тутуллуохтааҕын туһунан кэпсээтэ.  Кини: — Муоста тутуллуутун сүрүн сыала барыс киллэрии буолбатах, Саха Сирин илин уонна арҕаа өттүлэрин холбоон, нэһилиэнньэ олоҕун чэпчэтэр социальнай бырайыак буолар, – диэн тоһоҕолоон эттэ.

Бырайыак быһыытынан, муоста устата 3,12 км, муостаҕа тиэрдэр суол устата 10,9 км  буолаллар. Муоста икки балаһалаах, күҥҥэ 5,8 тыһыынча массыына туоруура сабаҕаланар. Хотугу сиргэ таһаҕаһы муостанан тиэйии  сыллааҕы ороскуота, быһа холуйан,  4,1 миллиард солкуобайынан кыччыан сөп.