Ахсынньы 5 күнүгэр Саха сирин баһылыга Айсен Николаев уонна РФ спорка миниистирэ Павел Колобков Чурапчытааҕы физкултуура уонна спорт судаарыстыбаннай института тэриллибитэ 20 сылыгар анаммыт үөрүүлээх тэрээһиҥҥэ кытынныллар. Айсен Николаев РФ Спорка министиэристибэтигэр спорт национальнай көрүҥнэригэр Чурапчытааҕы физкултуура институтугар тирэх үөрэх кыһатын статуһун биэрэр туһунан этии киллэрдэ.
Өрөспүүбүлүкэ Ил Дархана Айсен Николаев бу Арассыыйаҕа эрэ буолбакка, аан дойдуга кытта тыа сиригэр үлэлии олорор физическэй култуура уонна спорт үрдүк үөрэҕин кыһата буоларын бэлиэтээтэ.
“Саха сирин бастакы бэрэсидьиэнэ Михаил Николаев Ыйааҕынан Чурапчыга 20 сыллааҕыта төрүттэммитэ түбэһиэхчэ буолбатах . Бу сэлиэнньэ Саха сиригэр Олимпийскай албан аат биһигинэн буолар! Манна номоххо киирбит Дмитрий Петрович Коркин тыһыынчанан Саха сирин олохтоохторугар олох оскуолатынан буолбут уонна өрөгөйдөөх кыайыыларга тиэрдибит көҥүл тустууга бэйэтин оскуолатын тэрийбитэ. Эрэгийиэн баһылыга институт атаҕар турарыгар үлэлээбит, көмөлөспүт дьоҥҥо махтанна.
Физическэй култуура уонна спорт сайдыытын сэбиэтин алтынньытааҕы мунньаҕын түмүктэринэн Арассыыйа Бэрэсидьиэнэ Владимир Путин “Спорт тыа сиригэр” туспа хос бырагырааманы оҥорорго сорудахтаабыта. Чурапчытааҕы физкултуура института дойду баһылыгын бу сорудаҕын олоххо киллэриигэ үрдүк үөрэх тирэх кыһатынан буолуон сөп диэн эрэнэр Айсен Николаев. Кини институт сүүрбэ сыллаах уопута, наукаҕа олоҕуруута уонна методическай үлэлэрэ тыа сиригэр спордунан дьарыктаныныы тэрийиигэ дойдуга туһаны аҕалыахтарын сөбүн эттэ.
“2015 сыллаахха биһиги мас-рестлиммыт спорт национальнай көрүҥнэриттэн бастакынан Бүтүн Арассыыйатааҕы статуһу ылынар кыахтанна. Оччолорго аккредитацияҕа хамыыһыйаны салайбыт Павел Анатольевич Колобков көмөтүнэн мас тардыһыыта олох күүскэ сайынна. Бүгүн саха норуотун спордун төрүт көрүҥүнэн 30 тыһыынчаттан тахса киһи дьарыктанар, биэс континент 47 дойдутугар мас-рестлинг национальнай федерациялара бааллар”, —диэн эттэ Саха сирин баһылыга. Маныаха Чурапчытааҕы физкултуура института эмиэ оруоллааҕын ыйда.
Тыл этиитин түмүктүүрүгэр Айсен Николаев кэлэктиипкэ уонна институт устудьуоннарыгар ситиһиилэри баҕарда уонна өрөспүүбүлүкэ судаарыстыбаннай наҕараадаларын туттарда. РФ Спорка миниистирэ Павел Колобков Саха Өрөспүүбүлүкэтин Ил Дарханын Махталын тутта.
Павел Анатольевич эҕэрдэ тылыгар Чурапчытааҕы физкултуура института өрөспүүбүлүкэҕэ эрэ буолбакка, атын эрэгийиэннэргэ эмиэ олус суолталааҕын ыйда. “Аҕыйах хонугунан институкка 200 миэстэлээх саҥа уопсай дьиэни үлэҕэ киллэрэбит”, — диэтэ Павел Колобков. — Бу биһиги эрэгийиэҥҥэ уонна үрдүк үөрэх кыһатыгар бэлэхпит”. Санатан эттэххэ, Саха сирин Ил Дархана Айсен Николаев РФ спорка миниистирин кытта оробуочай көрсүһүүтүгэр ЧГИФКиС-кэ 100 миэстэлээх иккис уопсайы тутар туһунан боппуруоһу туруорбута.
Үөрүүлээх тэрээһиҥҥэ РФ Федеральнай Мунньаҕын Федерация Сэбиэтин Кэмитиэтин бэрэссэдээтэлин аграрнай, ас-үөл бэлиитикэтигэр уонна айылҕаны туһаныыга бэрэссэдээтэлин солбуйааччы Егор Борисов, Чурапчытааҕы физкултуура институтун бастакы ректора, СӨ Судаарыстыбаннай Мунньаҕын (Ил Түмэн) ыччат дьыалаларыгар, физическэй култуураҕа уонна спорка сис кэмитиэтин бэрэссэдээтэлэ Михаил Гуляев, тустаах институт ректора Иннокентий Готовцев тыл эттилэр. Москватааҕы физическэй култуура судаарыстыбаннай академиятын ректора Сергей Сайранов бочуоттаах ыалдьыттар ааттарыттан эҕэрдэлээтэ.
Саха Өрөспүүбүлүкэтин Ил Дарханын уонна Саха Өрөспүүбүлүкэтин бырабыыталыстыбатын пресс-сулууспата
Женни Стрюкова бэлэмнээтэ.