Айсен Николаев уонна Егор Борисов тирээн турар боппуруостары ырыттылар
Ил Дархан э.т. Айсен Николаев Москваттан кэлээт, тута Егор Борисовы, бырабыыталыстыбаны кытары көрүстэ. Егор Борисовтыын өрөспүүбүлүкэҕэ билигин тирээн турар боппуруостары ырыттылар уонна дойдубут инники сайдыытын туһунан кэпсэттилэр.
edersaas.ru
Кэпсэтиигэ, бастатан туран, халаан уутуттан эмсэҕэлээбит нэһилиэнньэлээх пууннарга көмө, эбийиэктэри чөлүгэр түһэрии туһунан кэпсэттилэр. Ону таһынан бүддьүөт туһунан киэҥник ырыттылар.
“Егор Борисовтыын өрөспүүбүлүкэ билиҥҥитин кэпсэттибит. Бастатан туран, субу билигин быһаарыллыахтаах дьыалалары ырыттыбыт. Егор Афанасьевич инники үлэбэр ситиһиини баҕарда. Кини уопута өрөспүүбүлүкэҕэ туһалаах буолуоҕа”, — диэн этэр Айсен Сергеевич иллэрээ күн суруналыыстары кытары көрсүһүүтүгэр.
Оттон утумнааһын туһунан этэригэр: “Өрөспүүбүлүкэҕэ олус элбэх оҥоһунна. Аҕыйах сылтан бэттэх биһиги региоммут күүскэ сайынна. Онно туһуламмыт үлэлэри салгыы ыытыахпыт. Ол иһигэр социальнай харыстабыл, тыа хаһаайыстыбатыгар баар көмө, мунициипальнай тэриллиилэри өрө тардыы бырагыраамата барыта оннунан хаалыаҕа. Ол эрээри билигин ситэ туһана илик кыахпытын барытын туһаныахпыт дии саныыбын. Чуолаан инновационнай сайдыыга үлэ барыахтаах”, — диэн этэр Айсен Сергеевич.
Аграфена КУЗЬМИНА, “Саха сирэ” хаһыат.