Айсен Николаев улуустар баһылыктарыгар чугастааҕы кэм соруктарын туруорда
Ил Дархан атырдьах ыйын 5 күнүгэр видеокэмпириэнсийэ киэбинэн улуустар баһылыктарын кытары ыыппыт сүбэ мунньаҕар санитарнай-эпидемиологическай быһыы-майгы, ойуур баһаардарын уонна оттооһун хамыытын боппуруостарын көрдө.
edersaas.ru
Айсен Николаев мунньаҕы саҕалыырыгар улуустар баһылыктарыгар Бырабыыталыстыба Бэрэссэдээтэлин э.т. Андрей Тарасенконы билиһиннэрдэ. Өрөспүүбүлүкэҕэ эпидемиологическай быһыы-майгы бигэтийбитин, ол эрээри, билигин да холкутуйарга эрдэтин эттэ. От ыйын ортотуттан коронавирус дьаҥар хаптарбыт дьон ахсаана Дьокуускайга сыыйа аҕыйыыр буоллаҕына, улуустарга эбиллэрин бэлиэтээтэ.
Ойуур баһаардарын туһунан иһитиннэрии оҥоһулунна. Атырдьах ыйын 5 күнүнээҕи туругунан, 12 улуус сиригэр-уотугар холбоон 1 786,5 гектар сири хабар 18 ойуур баһаарын умуруоруу үлэтэ ыытылларыттан, алта улууска 966 гектардаах тыаны хаппыт 7 баһаар бохсуллубут. Баһаары умуруорууга барыта 754 киһи уонна 69 тиэхиньикэ үлэлии сылдьар.
Сүбэ мунньах биир сүрүн боппуруоһунан оттооһун буолла. Киин уонна илин эҥээр улустарга курааннаан, оттооһун быйыл уустугурда. Билиҥҥи туругунан, сыл тахсар от 40 %-а чөкөтүллүбүт.
Сүрүн боппуруостарга иһитиннэрии кэнниттэн, Айсен Николаев улуустар баһылыктарыгар чугастааҕы кэм соруктарын туруорда. Миэстэҕэ дьаҥ үөскээһинин булан, бохсорго суһаллык үлэлииргэ, киин куораттан уонна атын сирдэртэн кэлэр дьоҥҥо, чуолаан аймахтарыгар сайылыы тахсар оҕолорго, болҕомтону ууран, хонтуруоллуур уонна сэрэтэр үлэни күүһүрдэргэ эттэ.
– Ураты чорботуллар соругунан пандемия кэмигэр үөрэх процеһын тэрийиигэ Роспотребнадзор ирбэллэрин толору тутуһан, саҥа үөрэх дьылыгар бэлэмнэнии буолар, – диэтэ Айсен Николаев итиэннэ атырдьах ыйын 20 күнүгэр диэри Үөрэх уонна наука министиэристибэтигэр үөрэх дьылын тэрийии былаанын оҥорон түһэрэргэ, оскуолалары оҕо доруобуйатын көрөр-бэрэбиэркэлиир тэхиньиичэскэй тэриллэринэн хааччыйарга, оскуолалары дезинфекциялааһыҥҥа үлэлииргэ сорудахтаата. Баһылыктар үөрэнээччилэр ортолоругар дьаҥы утары дьаһаллары тэрийиини, улахан дьону диспансеризациялааһыны тус хонтуруолга ылалларын. Доруобуйа харыстабылын министиэристибэтигэр коронавирус дьаҥын утары вакцинаҕа сайаапка түһэрэн, Арассыыйа Доруобуйаҕа харыстабылын министиэристибэтэ быһыыны маассабайдык биэрэр туһунан быһаарыыта тахсарын бэлэмнээх көрсөргө эттэ. Эһиги тэрээһиннээх үлэҕит түмүгэр ойуур баһаардарын умуруорууга тустаах сулууспалары таһынан, нэһилиэнньэ киэҥ араҥата тардыллан, ойуур баһаардара бохсуллан эрэллэр диэн баһылыктарга махтанна. Кэлэр да өттүгэр быһыыны-майгыны хонтуруолга тутарга, нэһилиэнньэҕэ өйдөтөр үлэни кэҥэтэр соругу туруорда.
– Кыстыыр оту хааччынарга мобильнай биригээдэлэри тэрийии улахан оруоллаах. Бырабыыталыстыба бу сыалга 25 мөл. солк. көрдө. Онон сайаапкаҕытын Тыа хаһаайыстыбатын министиэристибэтигэр түһэрэҥҥит, атырдьах ыйын 20 күнүгэр диэри харчы улуустарга тиэрдиллэрин хааччыйыҥ. Билигин тыа хаһаайыстыбатыгар үүт соҕотуопкатын субсидиятын ырычааҕын уларытар туһунан сокуон барыла оҥоһулла сылдьар. Улуустарга сокуон барылын киэҥник ырытыыны тэрийиҥ, кэккэ этиилэр киирэлэрин хааччыйыҥ, – диэн Айсен Николаев сүбэ мунньаҕы түмүктээбитин туһунан Ил Дархан уонна Бырабыыталыстыба пресс-сулууспата иһитиннэрэр.
Раиса Сибирякова, «Саха сирэ» хаһыат, edersaas.ru