Ил Дархан э.т. Айсен Николаев бүгүн олохтоох салайыныыны сайыннарыы Сэбиэтин мунньаҕын салайан ыытта. Бастатан туран, саҥа талыллыбыт улуустар баһылыктарын быыбардааччыларын итэҕэлин ылан, баһылык буолбуттарынан эҕэрдэлээтэ итиэннэ кинилэр үлэлэрин улууһу сайыннарыыга, нэһилиэнньэ олоҕун-дьаһаҕын хаачыстыбатын тупсарыыга туһаайалларыгар эрэнэрин биллэрдэ.
— Саҥа баһылыктар үлэҕитин дьону тэйитииттэн буолбакка, кинилэргэ эрэнииттэн, кинилэри түмүүттэн саҕалыыргыт наада. Миэстэҕэ олохтоох салайыныы үлэтэ-хамнаһа хайдах тэриллэриттэн олус элбэх тутулуктаах, — диэтэ.
Ил Дархан э.т. баһылыктар иннилэригэр улуустары сайыннарыыга ордук чорботуллар хайысхалары быһаарар соругу туруорда. Чопчу стратегия эрэ чорботуллар хайысхаларынан үбү-харчыны тардыыга, тыырыыга итиэннэ территориялары сайыннарыыны былааннааһыҥҥа тирэх буолуоҕа. Онуоха стратегияны ырытан оҥоруу нэһилиэнньэ көхтөөх кыттыыта суох көдьүүстээх түмүгү биэриэ суоҕа диэтэ. Саха Өрөспүүбүлүкэтин 2032 сылга диэри социальнай-экономическай сайдыытын Стратегиятыгар муниципальнай тэриллиилэр сайдыыларын соруктарын итиэннэ национальнай сыаллары уонна дойду Бэрэсидьиэнин ыам ыйынааҕы ыйааҕар этиллибит стратегическай соруктары, ону таһынан 2025 сылга диэри Уһук Илини сайыннарыы Национальнай бырагырааматын учуоттаан, этиилэри киллэрэргэ ыҥырда.
Салгыы олохтоох салайыныыны сайыннарыы Сэбиэтин үлэтин тэрээһинигэр кэккэ уларытыы оҥоһулларын эттэ. Бырабыыталыстыба саҥа састаабын тэрийиинэн уонна улуустарга саҥа баһылыктар талыллыбыттарынан сибээстээн, олохтоох салайыныыны сайыннарыы Сэбиэтин састааба эмиэ саҥардылларын быһааран, Сэбиэт бэрэссэдээтэлин эбээһинэһин бэйэтигэр ылынна.
— Мин үлэбэр сүрүн тирэхпин көрөбүн. Алта сыл устата бөдөҥ муниципалитет баһылыгынан үлэлээбитим, онон олохтоох салайыныы уоргана нэһилиэнньэҕэ саамай наадалаах уонна чугас былаас буоларын билэбин. Биһиги хайдах үлэлиирбититтэн-хамсыырбытыттан дьон олоҕун хаачыстыбата быһаччы тутулуктааҕын өйдөөн тураммыт, бииргэ үлэлиэхпит, ыарахаттары туоруохпут, — диэн түмүктээтэ бэйэтин этиитин Айсен Николаев.
Раиса Сибирякова, «Саха сирэ» edersaas.ru.