Айсен Николаев: «Саха сиригэр уоту утары ситиһиилээхтик туруулаһабыт, ол эрээри эбии үбүлээһин ирдэнэр”

Бүгүн өрөспүүбүлүкэҕэ эбии күүс уонна тэрил эрэ буолбакка, федеральнай киин өйөбүлэ ирдэнэр. Бу туһунан “Саха сирэ, иннибит диэки!” бырагыраама эфиригэр өрөспүүбүлүкэ баһылыга Айсен Николаев эттэ.

“Билигин Арассыыйа бэрэсидьиэнин Владимир Путин быһаарыытынан, Саха сиригэр эбии күүһү быраҕаллар. Дойду салалтатыттан мин тиэхиньикэни эрэ буолбакка, үбүнэн эмиэ көмөлөһөллөрүгэр көрдөһөбүн. Рослесхоз ыыппыт үбэ хайы-үйэ бүттэ. Билигин биһиэхэ “кредиторка” баар буолла. Биһигини өйүөхтэрэ диэн эрэнэбин”, — диэн Айсен Николаев быһаарда.
“Баһаар элбэх эрээри, итилэр иэннэрэ былырыыҥҥытааҕар 30 бырыһыанынан кыра. Уонна бу биһиги сулууспаларбыт суһаллык дьаһаналларын түмүгэр”, — диэн Саха сирин баһылыга бэлиэтээтэ.
Николаев уустук балаһыанньа Дьааҥы оройуонугар үөскээбитин эттэ – онно тыа хаһаайыстыбатыгар өртөөһүн түмүгэр уот ойуурга тахсан, тэнийэн барбыт. Маныаха олохтоох былаастар хойутаан дьаһаммыттара уонна субъект салалтатыгар тутатына тиэрдибэтэхтэрэ төрүөт буолбут.
“Сүрүннээн Авиалесоохрана, умулларыыга кыттар нэһилиэнньэ, ЫБММ, муниципалитеттар үчүгэйдик үлэлээтилэр. Айылҕаҕа баһаар турааччы уонна буолуо даҕаны диэн санаа баар. Онон биһиги сорукпут – балар ахсааннарын аҕыйатыы уонна содулун туоратыы”, — диэтэ кини.
Айсен Николаев быйыл умулларыллыбыт баһаар 30 бырыһыана хонтуруолланар зонаҕа баарын эттэ: “Дьиҥинэн, балары биһиги умулларыа суохтаахпыт, ол эрээри уот салгыы тэнийбэтин уонна дьон доруобуйатын эмсэҕэлэппэт туһугар маннык дьаһанабыт”.