Айсен Николаев: «Саха сиригэр коронавируһунан ыалдьыбыт дьон 78% үтүөрдэ»

Бүгүн, бэс ыйын 29 күнүгэр, 11:00 чааска Саха сирин Ил Дархана Айсен Николаев эрэгийиэҥҥэ коронавирус балаһыанньатын туһунан уочараттаах брифини ыытта. 

edersaas.ru

Өрөспүүбүлүкэ баһылыга иһитиннэрбитинэн, дьаҥ туруоҕуттан Саха сиригэр барыта 4178 киһи коронавирустаабыт. Бэҕэһээҥҥи чахчынан, COVID-19 дьаҥар 50 киһи хаптарбыта биллибит. Айсен Сергеевич ыарыы арыый намтаан эрэр диэн этэр:

— Дьокуускайга 37 киһи ыалдьыбыт, Нерюнгрига 6 киһи, Мииринэй улууһугар 4, Ленскэйгэ 2 киһи уонна Тааттаҕа биир. Дьаҥ тарҕаныыта арыый намтаан эрэр. Дьокуускайга аҕыйах киһи ыалдьыбыта ыам ыйын 21 күнүттэн бэлиэтэнэ илигэ.

Үтүөрүү эбилиннэ. Дьаҥнаабыттартан 78% олоччу үтүөрбүттэрэ бэлиэтэнэр. Маннык тэтими ыһыктыбатахпытына, от ыйын 2 күнүттэн, элбэх улууска хааччахтаныы эрэсиимин чэпчэтии иккис түһүмэҕэр киириэхпит диэн эрэнэбин, — диэтэ.

Ил Дархан, маны сэргэ, коронавируска анаалыһы бэрэбиэркэлээһиҥҥэ, өрөспүүбүлүкэ бастыҥ үлэлээхтэр ортолоругар киирсэрин иһитиннэрдэ.  Ааспыт хонукка түөрт тыһыынчаттан тахса тест оҥоһуллубут буоллаҕына, дьаҥ Саха сиригэр ааҥныаҕыттан,  222 тыһыынчаттан тахса анаалыс оҥоһуллубут.

Егор Карпов, «Саха сирэ» хаһыат, edersaas.ru