Айсен Николаев: «Үс күҥҥэ киин куоракка дьаҥ тарҕаныытын бохсууга кытаанах дьаһаллары ылабыт»
Бүгүн сарсыарда 11 чааска Ил Дархан Айсен Николаев коронавирус туругун туһунан ыыппыт брифинигэр, бу кэлэр үс күҥҥэ дьаҥ тарҕаныытын бохсууга быһаарыылаах дьаһал ылылларын эттэ.
edersaas.ru
Ааспыт сууккаҕа өрөспүүбүлүкэ үрдүнэн 94 киһи дьаҥҥа хаптарбыта биллибит. Итинтэн 56 киһи киин куорат олохтоохторо буолаллар, ону таһынан 22 киһи Ленскэй улууһун Чайыҥдатыгар уонна Талакааныгар ыалдьыбыт. Мэҥэ Хаҥаласка ыалдьыбыт дьону кытары алтыспыт аҕыс киһи ыалдьыбыт, олору хааччахтыыр уонна эмтиир дьаһаллар суһаллык, толору тэриллэннэр, ыарыы көрдүгэнэ бохсуллубут. Онон бу улууска дьаҥ хаптайарыгар эрэл үөскээбит.
— Дьокуускайга 56 киһи ыалдьыбыта балаһыанньа билигин да олус тыҥааһыннааҕын көрдөрөр. Салгыы маннык бардаҕына, ыарыы өссө тэнийэр кутталлаах. Ол иһин, бу кэлэр үс күҥҥэ хааччахтыыр уонна санитарнай-эпидемиологическай дьаһаллары күүһүрдэн, ыарыы тарҕаныытын боҕустахха табыллар. Онон, бээтинсэҕэ тэрилтэлэр офистарын итиэннэ киин куорат дьаһалтата болуоссаттары, оҕо оонньуур былаһааккаларын, оптуобус тохтобулларын эмтииллэрэ ирдэнэр. Субуотаҕа итиэннэ өрөбүлгэ оптуобустар сырыылара тохтотуллар, маҕаһыыннар үлэлэрэ итиэннэ дьон дьаарбайыыта хааччахтанар. Онон куорат олохтоохторо баар балаһыанньаны өйдөөҥҥүт, бу үс күҥҥэ изоляцияланыы эрэсиимин кытаанахтык тутуһаргытыгар, дьиэҕитигэр олороргутугар ыҥырабын, — диэтэ Ил Дархан.
Раиса Сибирякова, «Саха сирэ» хаһыат, edersaas.ru