СӨ Ил Дархана Айсен Николаев Орто Халыма оройуонугар командировкатын кэмигэр, А. Созонов аатынан Оҕо искусствотын оскуолатын саҥа дьиэтин көрдө.
Искусство оскуолатын уопсай иэнэ 752 кв. миэтэрэ, “Сахам сирэ XXI үйэҕэ” үтүө дьыала өрөспүүбүлүкэтээҕи хамсааһын бырагырааматынан тутуллан, олунньуга үлэҕэ киирбитэ.
Оскуола саҥа, таас дьиэҕэ киириэн иннинэ, 1969 сыллааҕы мас, саахалланар туруктаах дьиэҕэ үлэлии олорбута. Ол көтүллүбүтэ. Онтон эргэ уһуйааҥҥа көспүтэ, баһаарга эмсэҕэлээбитэ. Онон сыл устата араас тэрилтэлэринэн – олохтоох кулуупка, орто оскуолаҕа үлэлии олорбута.
“Култуура” национальнай бырайыак иитинэн Оҕо искусствотын оскуолата 2019 сыллаахха муусука саҥа инструменнарынан уонна тэрилинэн хааччыллыбыта. Муусука инструменнарын уонна тэрилин атыылаһыыга оскуола 4,2 мөлүйүөн солкуобайы ылбыта, ол иһигэр федеральнай хааһынаттан – 3,8 мөлүйүөн солкуобай.
Күн бүгүн хореография, фортепиано, норуот фольклора, уус-уран искусство хайысхатынан 187 оҕо үөрэнэр. Оҕолору кытта 10 педагог дьарыктанар.
А. Созонов аатынан Орто Халыматааҕы Оҕо искусствотын оскуолатын үөрэнээччилэрэ “Розовая чайка” эдэр толорооччулар норуоттар икки ардыларынааҕы аһаҕас куонкурустарын лауреатынан, “Осенние краски” өрөспүүбүлүкэтээҕи куонкурус дипломанынан, Бүтүн Арассыыйатааҕы уус-уран куонкурустар призердарынан буолаллар.
Айсен Николаев оскуолаҕа сылдьан саҥа үөрэнэр хостору, муусука уонна хореография саалаларын көрдө, преподавателлэри кытта кэпсэттэ.
СӨ Ил Дарханын уонна Бырабыыталыстыбатын пресс-сулууспата.