Саха сирин баһылыга Марха өрүһү туоруур муоста тутуутун билистэ.
Өрөспүүбүлүкэ баһылыга Айсен Николаев Ньурба оройуонугар “Бүлүү” федеральнай массыына суолун 756-с км Марханы туоруур муостаны тутууну көрдө. Өрөспүүбүлүкэҕэ эрэ буолбакка, Уһук Илиҥҥэ бүттүүнүгэр ураты эбийиэги тутууну 2015 сылга саҕалаабыттара. 2019 сыл сэтинньитигэр исписэлиистэр үс муостаны тутуохтаахтар – 560 п.м. усталаах Марханы туоруур муостаны уонна 55 п.м уонна 34 п.м. усталаах Маары туоратар муостаны.
Тутааччылар этэллэринэн, муоста тирэхтэрэ тутуллубуттар, бүгүн 3700 туоннаттан 2455 пролетнай тутуу таҥыллыбыт. Маарга эмиэ тирэхтэр бэлэмнэр. Кирилиэс конструкциятын таҥыы, тимир-бетон билиитэлэрин иҥиннэрии, муостаттан ууну ыытар тэрил оҥоһуллар. Манна тэҥинэн 6 км усталаах муостаҕа массыына суолун тутуу ыытыллар.
Айсен Николаев өрүс арҕаа уонна илин өттүгэр баар аспаал-бетон собуоттарын бэлэмнэрин көрдө. От ыйын ортотуттан үлтүркэй тааһынан тэлгиэхтэрэ, онтон аспаалы оҥоруохтара.
“Бу федеральнай суолларга бөдөҥ туоратар муосталартан биирдэстэрэ. Тутуу түмүктэннэҕинэ, Бүлүү умнаһынааҕы оройуоннар олохтоохторугар эрэ буолбакка, Саха сирин арҕаа өттүгэр эмиэ тырааныспар кыһалҕатын быһаарар кыахтаныахтара”, — диэтэ өрөспүүбүлүкэ баһылыга.
Кэлэр сылга “Бүлүү” федеральнай массыына суолун 702-с км Түүкээни туоратар муоста тутуута түмүктэниэҕэ диэн эбэн эттэ Ил Дархан. Онтон кэлэр биэс сыл устата “Бүлүү” суолга управлениета Бүлүүнү туоруур муостаны тутуоҕа, итинтэн саамай бөдөҥнөрө Үөһээ Бүлүү улууһугар буолуоҕа. Бу Иркутскай — Мииринэй – Дьокуускай – Магадан туһаайыытынан сылы эргиччи массыына сылдьарын хааччыйыаҕа.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-слууспата.