Айсен Николаев Илин эҥэр оройуоннарга сүөһү аһылыгын бэлэмнээһиҥҥэ көһө сылдьар сүбэ мунньаҕы ыытта

Ааптар: 
Бөлөххө киир:

Айсен Николаев Илин эҥэр оройуоннарга сүөһү аһылыгын бэлэмнээһиҥҥэ көһө сылдьар сүбэ мунньаҕы ыытта.

Саха сирин Ил Дархана Айсен Николаев от ыйын 22 күнүгэр Мэҥэ Хаҥалас улууһугар оробуочай сырыытын кэмигэр оттуур уонна тыа хаһаайыстыбатын ходуһаларын көрдө, тыа хаһаайыстыбатын, бааһынай, фермерскэй хаһаайыстыбалар бэрэстэбиитэллэрин кытта көрүстэ уонна өрөспүүбүлүкэ илин эҥэр оройуоннарыгар сүөһү аһылыгын хампаанньатын боппуруостарыгар көһө сылдьар сүбэ мунньаҕы ыытта.
Бөкө сэлиэнньэтигэр Анабы диэн сиргэ Айсен Николаев 65 гектар иэннээх “Морозов” фермерскэй хаһаайыстыба оттуур ходуһаларыгар сырытта. Догдоҥо нэһилиэгин баһылыга Иван Новгородов 2017 сыллаахха Роман Морозов өрөспүүбүлүкэ Тыатын хаһаайыстыбатын министиэристибэтин нөҥүө саҥа саҕалыыр фермер быһыытынан 1,5 мөлүйүөн солкуобай кээмэйдээх грант өйөбүлүн ылан, оттуур тиэхиньикэни уонна 20 төбө сүөһүнү атыыласпытын кэпсээтэ. Бүгүн фермерскэй хаһаайыстыбаҕа 50 ынах уонна 30 тахса сылгы иитиллэн турар.
Айсен Николаев салгыы сэбиэскэй кэмнээҕи Хорообуттааҕы нүөлсүтэр тиһиги көрдө. Өрөспүүбүлүкэ Тыатын хаһаайыстыбатын министиэристибэтин “Упрмелиоводхоз” тэрилтэтин Илин эҥэрдээҕи филиалын үлэһиттэрэ кэпсээбиттэринэн, 361 гектар сири ньүөлсүтэргэ 1993 сыллаахха муҥутаабыта 3,5 миэтэрэ ууну аһарар кыамталаах тиһик үһүс шлюз-регулятора үлэҕэ киирбит. Бүгүҥҥү туругунан Суола үрэхтэн ууну көҥүллүк аһарарга шлюз-регуляторы саҥардан оҥоруу ирдэнэр. Бырайыагы билсэн баран, Айсен Николаев үп булан, үһүс шлюз-регуляторы чөлүгэр түһэрэргэ сорудахтаата.
Төҥүлү сэлиэнньэтигэр Ил Дархан Тукулуйа алааска сылдьан үлэ бэтэрээнэ, тыа хаһаайыстыбатын үтүөлээх үлэһитэ Николай Бойцовы кытта сэһэргэстэ. Николай Михайлович ааспыт сылтан олохтоох дьаһалта быһаарыытынан оттуур ходуһалар кэтэх хаһаайыстыбаларга бэриллибиттэрин кэпсээтэ. Кини маннык дьаһаныы тыа сирин олохтоохторун өйүүр ньыманан буоларын бэлиэтээтэ. “Ити эрээри, быйыл от үүнүүтэ мөлтөх, тыа сирин олохтоохторо сүөһүлэрин уонна сылгыларын төбөтүн аччатыахтарын баҕарбаттар. Мин уолаттарым эмиэ тыа хаһаайыстыбатынан дьарыктаналлар: улахан уолум Михаил — “Сардаҥа” кэпэрэтиип бэрэссэдээтэлинэн, аччыгый уолум Альберт “Баишев” фермерскэй хаһаайыстыба баһылыгынан буолаллар”, — диэн Николай Бойцов кэпсээтэ уонна Ил Дархаҥҥа тыа хаһаайыстыбатыгар куруук болҕомтотун уурарын иһин махтанна.
Салгыы Төҥүлү сэлиэнньэтин култуурунай киинигэр өрөспүүбүлүкэ баһылыга Илин эҥэр улуустар уонна нэһилиэктэр баһылыктарын кыттыылаах көһө сылдьар сүбэ мунньаҕы ыытта. Тыа хаһаайыстыбатын министиэристибэтэ иһитиннэрбитинэн, быйыл өрөспүүбүлүкэҕэ 479 тыһыынча туонна оту, 24 тыһыынча туонна сиилэһи уонна 14 тыһ. 200 туонна сенаһы бэлэмниэхтээхтэр. Ил Дархан Мэҥэ Хаҥалас уонна Уус Алдан улуустарыгар сүөһү аһылыгын бэлэмнээһиҥҥэ уустук балаһыанньа үөскээбитин бэлиэтээтэ уонна туһааннах министиэристибэҕэ ыраах учаастактарга оттуу барар улуустар мобильнай биригээдэлэригэр көмөлөһөллөрүгэр сорудахтаата.
Сүбэ мунньах кэмигэр оройуон уонна нэһилиэктэр баһылыктарын, тыа хаһаайыстыбатын тэрилтэлэрин салайааччыларын кытта тыа хаһаайыстыбатын салаатын сайыннарыыга сэргэх кэпсэтии тахсыбытын бэлиэтээтэ. “Улуустар уонна нэһилиэктэр баһылыктара тэрээһиннээх хаһаайыстыбалары тэрийии уонна сайыннарыы бэлиитикэтин өйүүллэрин итэҕэйдим. Бу хайысхаҕа салгыы үлэлиэхпит, ол иһигэр оҥорон таһаарыыны уонна үүтү туттарыыны субсидиялааһыҥҥа. Чугастааҕы нэдиэлэлэргэ бырабыыталыстыба сөптөөх быһаарыныыны ылыныаҕа диэн эрэнэбин, ол иһигэр бүгүҥҥү мунньах түмүктэринэн”, — диэн түмүктээтэ Айсен Николаев.

Саха Өрөспүүбүлүкэтин Ил Дарханын уонна Саха Өрөспүүбүлүкэтин бырабыыталыстыбатын пресс-сулууспата

+1
0
+1
0
+1
0
+1
0
+1
0
+1
0
+1
0