Бу нэдиэлэҕэ Москваҕа Уһук Илин эрэгийиэннэрин күннэрэ ыытылла тураллар. Ил Дархан Айсен Николаев бэҕэһээ “Геопромайнинг” диэн көмүһү, сурьманы, сибиниэһи хостуур хампаанньа салайааччыта Роман Худолийы кытары бииргэ үлэлииргэ сөбүлэһии түһэристэ.
Ыспыраапка быһыытынан эттэххэ, бу хампаанньа Арассыыйа эрэгийиэннэрин таһынан, Арменияҕа үлэлиир. Саха сиригэр “Сарыылаах-Сурьма” уонна “Звезда” диэн көмүс, цинк баайдаах сири ылан үлэлэтэр. Ону таһынан Томпо улууһугар Үөһээ Мэҥкэчэҕэ үрүҥ көмүһү, цинканы, сибиниэһи хостуур.
Сөбүлэһиигэ урукку баар дуогабарга олоҕуран, хаһаайыстыбаннай, экэнэмиичэскэй, материальнай-техническэй боппуруостар, олохтоох каадырдары үлэлэтиини салгыы ыытар туһунан пууннар киирдилэр. Ону таһынан тулалыыр эйгэни харыстааһыҥҥа Ил Дархан ураты болҕомтотун уурда.
Хампаанньа салайааччыта Роман Николаевич бэлиэтииринэн, бу сөбүлэһии Саха сирин кытары салгыы үлэлэһиигэ үктэл буолар. “Саха сиригэр биһиги уонтан тахса сыл үлэлиибит. Онон хампаанньабыт сайдыыта Саха Өрөспүүбүлүкэтин кытары быһаччы сыһыаннаах. Хампаанньабыт 80 % үлэһиттэрэ бары олохтоохтор уонна Саха сиригэр сүүрбэттэн тахса сыл үлэлээбит дьон. Онон биһиэхэ социальнай эйгэни сайыннарыы эмиэ биир инники тутар боппуруоспут”, — диэн бэлиэтиир кини.
Аграфена КУЗЬМИНА, “Саха сирэ” хаһыат, edersaas.ru