Айсен Николаев Байкал-Амур тимир суол ыллыгын тутуу саҕаламмыта 45 сылыгар анаммыт бырааһынньыктааҕы тэрээһиҥҥэ кытынна. Амур уобалаһын Тында куоратыгар Саха сирин баһылыга Нерюнгриттан пуойаһынан кэллэ.
Арассыыйа Федерациятын бырабыыталыстыбатын бэрэссэдээтэлин солбуйааччы Максим Акимовы, Арассыыйа тырааныспарын миниистирэ Евгений Дитриҕы, “РЖД” ААУо генеральнай дириэктэрин-бырабылыанньа бэрэссэдээтэлэ Олег Белозеровы уонна Арассыыйа эрэгийиэннэрин губернатордарын кытта Саха сирин Ил Дархана үөрүүлээх миитиҥҥэ кыттан, БАМ бэтэрээннэрин эҕэрдэлээтэ диэн өрөспүүбүлүкэ Ил Дарханын уонна бырабыыталыстыбатын пресс-сулууспата иһитиннэрдэ.
“Биһиги өрөспүүбүлүкэбитигэр БАМ – бу көннөрү тимир суол эрэ буолбатах. Дойдубут атын өттүн кытта дьиҥнээхтик ситимниир уонна Саха сирин соҕуруу өттүн эрэ буолбакка, эрэгийиэни бүттүүн сайыннарар кыаҕы биэрэр тутуу”, — диэтэ Айсен Николаев эҕэрдэ тылыгар.
Саха сирин баһылыга биир дойдулаахтарын Амур уобалаһыттан Саха сиригэр диэри тимир суол кэрчигин — Аччыгый БАМ-ы төрүттээһиҥҥэ киллэрбит кылааттарын аҕынна, тимир ыллыгы тутууну уопсастыба сомоҕолоһуутунан ааттаата.
“Тимир суолу тутуу сомоҕолоһуу уонна патриотизм сүҥкэн тыынынан буолар. БАМ-ы тутааччылар хорсун-хоодуот быһыыларын түмүгэр, Тимир суол үлэһиттэрин күнүн көрсө, Саха сиригэр от ыйын 27 күнүгэр Аллараа Бэстээх ыстаансыйатыттан пассажирдар сылы эргиччи сырыылара саҕаланыаҕа”, — диэтэ кини.
СИА.