Бүгүн, ыам ыйын 28 күнүгэр, Айсен Николаев Саха Өрөспүүбүлүкэтин Аҕа Баһылыгын эбээһинэһигэр киирбитэ икки сыла буолла.
Үгэс быһыытынан, кини бүгүн өрөспүүбүлүкэ сонуннары киэҥник тарҕатар тэрилтэлэр салайааччыларын кытта көрүстэ уонна кинилэр ыйытыыларыгар хоруйдаата. Тэрээһин бу сырыыга уратытык ыытылынна – билиҥҥи кэм ирдэбилининэн, Ил Дархан интэриниэт ситимин нөҥүө сэһэргэстэ.
Пресс-конференция кэмигэр Ил Дархаҥҥа араас ис хоһоонноох ыйытыы бэриллибитэ. Ол эрээри, олортон үгүһэ дьаҥ туһунан этэ. «Дьиэҕэ олоруу хааччахтааһына өссө төһө өр буолуой?» — диэн ыйытыыга Айсен Николаев маннык быһааран биэрдэ:
— Дьокуускай уонна улахан куораттарга дьиэҕэ олоруу хааччаҕын устарга билигин төрүөт суох. Сорох сирдэргэ ыалдьыбыт дьон ахсаана элбээн иһэр. Дьокуускай куоракка суһал ыстаап этиитинэн, бэс ыйын 14 күнүгэр диэри уһатарбыт буолуо.
Бу кэлэр үс күҥҥэ улахан туһаайыыны оҥоробут. Бээтинсэҕэ туох баар тэрилтэлэр үлэлиир дьиэлэригэр уонна тулалыыр сирдэригэр ыарыыны утары эмтээһини ыытыахтара. Субуотаҕа уонна өрөбүлгэ Дьокуускайга дьону таһар оптуобустар сырыылара тохтуоҕа. Бу күн ас атыылыыр эрэ маҕаһыыннар үлэлиэхтэрэ. Оттон өрөбүлгэ туох баар маҕаһыыннар, атыылыыр сирдэр сабыллыахтара.
Бу барыта киин куоракка үөскээбит балаһыанньа төһө кыалларынан түргэнник уларыйарыгар туһаайыллан оҥоһуллар. Оччоҕуна кэлэр нэдиэлэҕэ коронавируһунан ыалдьыбыт дьон ахсаана лаппа аҕыйыа диэн кэтэһэбит.
Бэс ыйын 10 күнүгэр балаһыанньа үчүгэй өттүгэр уларыйарын сабаҕалыыбыт. Ол эрээри, бу барыта олохтоох дьон үс күн устата дьиэҕэ олорууну толору тутустахтарына эрэ туолар кыахтаах. Ону өссө төгүл тоһоҕолоон этэбин.
Родион Кривогорницын, «Саха сирэ» хаһыат, edersaas.ru
ТАСС хаартыската.