Улуу Кыайыы бырааһынньыгын иннинэ Саха сирин баһылыга Айсен Николаев видео-кэмпириэнсийэ сибээһинэн бэтэрээннэри Улуу Кыайыы 75 сылынан эҕэрдэлээтэ.
edersaas.ru
Айсен Николаев өрөспүүбүлүкэ бары олохтоохторун аатыттан кинилэр таһаарыылаах үлэҕэ хорсун быһыыларын иһин махтанна уонна аныгы көлүөнэ бу кыайыы хайдах курдук сыранан кэлбитин, кинилэр олохторугар ханнык тургутуулары ааспыттарын умнуохтара суоҕа диэтэ. “Мин бэтэрээннэрбит чөл өйүнэн уонна үөрэ-көтө олороллоруттан олус үөрэбин. Бүгүн Саха сиригэр саамай күндү уонна ытыктанар дьон, Аҕа дойду Улуу сэриитин кыттыылаахтара, милитаристыы Японияны кытта кыргыһыыга кыттыбыт, турунан туран, кыайан, дойдуларыгар эргиллибит бэтэрээннэр олороллор. Хас биирдиигит дойдубут устуоруйатын тыыннаах сорҕотунан буолаҕыт. Эһигиттэн Ийэ дойдуну таптыырга, көмүскүүргэ, күүстээх уонна көҥүл дойдуну тутарга үөрэнии – билиҥҥи көлүөнэҕэ улуу чиэс”, — диэн Саха сирин баһылыга бэлиэтээтэ.
Улуу Кыайыы үбүлүөйдээх сылын устата Саха сиригэр билиҥҥэ диэри кэнники дьылҕалара биллибэт саллааттар тустарынан өйдөбүллэри чөлүгэр түһэриигэ көрдүүр үлэлэр ыытылыннылар. Кыайыы волонтердарын күүһүнэн өрөспүүбүлүкэ куораттарыгар уонна сэлиэнньэлэригэр өйдөбүнньүктэр уонна обелискалар саҥардылыннылар. Фронтовиктар, тыыл үлэһиттэрин тустарынан кинигэлэр таҕыстылар, документальнай киинэлэр уонна теле-биэриилэр уһулуннулар. Дойду бүттүүнүгэр курдук, Саха сирин бүттүүнүгэр ыччат, үөрэнээччилэр уонна устудьуоннар кыттыылаах үгүс аахсыйалар ыытыллаллар.
Айсен Николаев Улуу Кыайыы 75 сылыгар уһулуччу болҕомто Аҕа дойду Улуу сэриитин кыттыылаахтарыгар ууруллубутун бэлиэтээтэ. Быйыл Саха Өрөспүүбүлүкэтин саамай үрдүк наҕараадалара уонна ааттара бэтэрээн-фронтовиктарга иҥэрилиннилэр. СӨ “Хотугу сулус” уордьанынан милитаристыы Япония сэриитин кыттыылааҕа, устуорук, кыраайы үөрэтээччи, биллэр бэйиэт Петр Кириллович Конкин наҕараадаланна. “Саха Өрөспүүбүлүкэтин бочуоттаах гражданина» аат милитаристыы Япония сэриитин кыттыылааҕар, СӨ суолун хаһаайыстыбатын үтүөлээх үлэһитигэр Петр Константинович Яковлевка иҥэрилиннэ. Сибээс уонна иһитиннэрэр технологиялар эйгэлэригэр П.И.Дудкин аатынан СӨ Судаарыстыбаннай бириэмийэтэ Европаны босхолоспут фронтовикка, кыайыылаах бойобуой суолун Германияҕа түмүктээбит Алексей Данилович Вересовойга ананна.
“Ыарахаттартан толлубакка көрдөрбүт холобургутунан биһиги аан дойдуну сабардаабыт коронавирус инфекциятын булгуччу кыайыахпыт. Эһиги бэйэҕитин олох харыстаныҥ, долгуйумаҥ, бу боппуруоска биһиэхэ эрэниҥ, уонна биһиги булгуччу үөрүүлээх быһыыга-майгыга СӨ үрдүк наҕараадатын туттарыахпыт, эһигинниин тэҥҥэ Сахабыт сирин куораттарын уонна сэлиэнньэлэрин уулуссаларын устун Өлбөт үйэлээх полк кэккэтигэр хаамыахпыт, Москваҕа Кыһыл болуоссакка ыытыллар бырааһынньыктааҕы параады көрүөхпүт. Эһигини өссө төгүл бырааһынньыгынан эҕэрдэлиирбин көҥүллээҥ, чэгиэн доруобуйаны уонна уһун олоҕу баҕарабын! Эһигинэн киэн туттабыт, күндү бэтэрээннэрбит!”, — диэн эҕэрдэтин Айсен Сергеевич түмүктээтэ.
Видео-кэмпириэнсийэ сибээһинэн бэтэрээннэри сэрии, тыыл уонна үлэ, сэбилэниилээх күүстэр уонна быраабы араҥаччылыыр уорганнар бэтэрээннэрин өрөспүүбүлүкэтээҕи сэбиэттэрин бэрэссэдээтэлэ Вильям Иванов, Дьокуускай куорат баһылыга Сардана Авксентьева эҕэрдэлээтилэр.
Бэтэрээннэр ааттарыттан Аҕа дойду Улуу сэриитин кыттыылаахтара Петр Конкин уонна Петр Яковлев эҕэрдэлээтилэр. Кинилэр өрөспүүбүлүкэ салалтатыгар уонна бырабыыталыстыбатыгар, чуолаан, Саха сирин Ил Дарханыгар Айсен Николаевка уҕараабат кыһамньытын уонна бэтэрээннэргэ болҕомтотун иһин махтаннылар. “Быйыл Кыайыы күнүн коронавирус дьаҥын судургута суох усулуобуйатыгар бэлиэтиибит, ол эрээри туох да буолбутун иһин, бу улуу бырааһынньык тыынын туох да өлбөөдүрдүө суоҕа. Биһиги өрөспүүбүлүкэ салалтата, Ил Дархаммыт Айсен Сергеевич Николаев бу ыарахан дьаҥтан өрөспүүбүлүкэ олохтоохторун олоҕун күөмчүлээри бары миэрэлэри ылыналларын көрөбүт. Өрөспүүбүлүкэ бэтэрээннэрин аатыттан чэпчэкитэ суох үлэҕитигэр ситиһиилэри, тулууру, күүһү баҕарабыт уонна дойдубут уонна өрөспүүбүлүкэбит бу кутталаах ыарыыны кыайыахтара диэн эрэнэбит!”, — диэтэ Петр Константинович Яковлев.
Бэтэрээннэри Д.К.Сивцев-Суорун Омоллоон аатынан Опера уонна балет судаарыстыбаннай тыйаатыра, Эстрада судаарыстыбаннай тыйаатыра, СӨ Судаарыстыбаннай филармониятын симфоническай хора эҕэрдэлээтилэр.
Саха Өрөспүүүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Мария Васильева, СИА хаартыската
Бэлэмнээтэ Женни СТРЮКОВА, “Саха сирэ” хаһыат.