Айсен Николаев Арассыыйа Федерациятын Судаарыстыбаннай Сэбиэтин президиумун састаабыгар киирдэ
Атырдьах ыйын 2 күнүгэр Арассыыйа Бэрэсидьиэнэ Владимир Путин бигэргэппит Арассыыйа Федерациятын Судаарыстыбаннай Сэбиэтин президиумун саҥа састаабыгар Саха сирин Ил Дархана Айсен Николаев киирдэ.
Судаарыстыбаннай Сэбиэт президиума суһал боппуруостары быһаарар, Судаарыстыбаннай Сэбиэт үлэтин былаанын олоххо киллэриини ырытар. Аҕыс чилиэннээх президиум персональнай састаабын Арассыыйа Бэрэсидьиэнэ быһаарар уонна кини дьаһалынан бигэргэнэр.
Саха сирин баһылыга Айсен Николаевы сэргэ РФ Судаарыстыбаннай сэбиэтин президиумугар Хотугу Осетия – Алания Өрөспүүбүлүкэтин баһылыга Вячеслав Битаров, Адыгея Өрөспүүбүлүкэтин баһылыга Мурат Кумпилов, Брянскай уобалас губернатора Александр Богомаз, Омскай уобалас губернатора Александр Бурков, Нижегородскай уобалас губернатора Глеб Никитин, Ямало-Ненецкэй автономнай уокурук губернатора Дмитрий Артюхов уонна Ненецкэй автономнай уокурук губернатора Александр Цыбульскай киирдилэр.
Санаттахха, туһааннаах сэбиэт судаарыстыбаннай былаас сөпкө үлэлиирин уонна судаарыстыбаннай былаас уорганнарын кытта бииргэ үлэлиирин хааччыйыы боппуруостарыгар судаарыстыба баһылыгын боломуочуйаларын олоххо киллэриигэ көмөлөһөр сүбэлэһэр уорганынан буолар. Судаарыстыбаннай сэбиэт чилиэннэринэн Федерация Сэбиэтин уонна РФ Федеральнай Мунньаҕын Судаарыстыбаннай Дууматын бэрэссэдээтэллэрэ, федеральнай уокуруктарга Арассыыйа Бэрэсидьиэнин боломуочуйалаах бэрэстэбиитэллэрэ, үрдүкү дуоһунастаах дьон – РФ субъектарын судаарыстыбаннай былааһын үрдүкү ситэриилээх уорганнарын салайааччылара, Судаарыстыбаннай Дуумаҕа фракциялар салайааччылара буолаллар.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата