Айсен Николаев Амматааҕы оонньуулары арыйда

Бөлөххө киир:

Бүгүн, от ыйын 4 күнүгэр, «Амма Олимпик» стадиоҥҥа Саха сирин норуоттарын спортивнай оонньууларын үөрүүлээх арыллыыта буолла. Тэрээһини өрөспүүбүлүкэ Ил Дархана Айсен Николаев арыйда.

Аммаҕа от ыйын 3-8 күннэригэр спорт 16 көрүҥэр илин-кэлин түсүһүүлэр ыытылла тураллар. «Амма Олимпик» стадиоҥҥа оонньуулар үөрүүлээх арыллыыларыгар олохтоохтор уонна ыалдьыттар муһуннулар. Манна Саха сирин спордун бэтэрээннэрэ, ааспыт сыллардааҕы спартакиадалар чөмпүйүөннэрэ сэлэлии хааман киирдилэр. Кинилэр кэнниттэн — оонньуулар судьуйалара, кыттааччылар. Амма олохтоохторо улуус историятын, биллэр дьонун киэн тутта ыалдьыттарга билиһиннэрдилэр.

Спортивнай оонньуулар арыллыыларыгар Саха сирин Ил Дархана Айсен Николаев:

«Ытыктабыллаах Амма улууһун ытык-мааны олохтоохторо, ыалдьыттара, спортсменнар, бэтэрээннэр, бука барыгытын Саха сирин норуоттарын сэттис спортивнай оонньуулара саҕаламмытынан эҕэрдэлиибин! Туох баар өрөспүүбүлүкэ олохтоохторун уонна тус бэйэм ааппыттан Амма дьонугар-сэргэтигэр ис сүрэхпиттэн махталбын тиэрдэбин. Кинилэр былырыыҥҥы халаан уутун кэнниттэн Амманы чөлүгэр түһэрдилэр, ону ааһан спортивнай бырааһынньыгы тэрийдилэр. Мин бүгүн Амма нэһилиэктэринэн сырыттым, сыл иһигэр тупсубуттарын, тутуу, саҥардыллыы үлэтэ күүскэ барбытын сөҕө көрдүм. Бу барыта инникигэ сайдыыны саҕыаҕа дии саныыбын.

Саха сирин норуоттарын спортивнай оонньуулара — биһиги олимпиадабыт. Манна 34 хамаанда кэлэн 16 көрүҥҥэ күөн көрсө сылдьар. Быйыл оонньуулар бырагыраамаларыгар адаптивнай спорт көрүҥнэрэ киирдилэр, онон 244 киһи күрэхтэһэ сылдьар. Кинилэр доруобуйаларынан төһө да хааччахтаах буоллаллар, биһигини кытта баалларыгар, бииргэлэригэр үөрэбит уонна махтанабыт. Дойду бэрэсидьиэнэ Владимир Путин Арассыыйа нэһилиэнньэтэ спордунан дьарыктаныахтаах диэн соругу туруорбута. Мин бүгүн Саха сиригэр спордунан дьарыктаналларын көрөбүн, спартакиада кыттааччылара ону холобурдууллар. Күрэхтэһии улахан таһымнаахтык ааһыа диэн эрэнэбин уонна Саха сирин норуоттарын сэттис спортивнай оонньууларын арыллыбытынан ааҕабын!«, — диэн тыл эттэ.

Айтана Аммосова, edersaas.ru

+1
0
+1
0
+1
0
+1
0
+1
0
+1
0
+1
0