Арассыыйа-Кытай VI ЭКСПО-тын кэмигэр Саха сирин баһылыга Айсен Николаев Харбиннааҕы кэлимсэ бондовай зонаҕа сырытта уонна Хэйлунцзян провинциятын киинигэр араас табаардары тиэрдии, харайыы уонна тырааныспарынан тиэрдии ньыматын билистэ.
Харбиннааҕы кэлимсэ бондовай зона дьаһалтатын начаалынньыга Лю Чжэньцзян ыалдьыттарга ыскылааты көрдөрдө уонна кыраныыссатааҕы электроннай эргиэн туһунан кэпсээтэ. Кини манна бүтүн аан дойдуттан омук бородууксуйата киирэрин бэлиэтээтэ. Электроннай былаһаакканан сакаастааһын уонна таможня докумуонун толоруу кэнниттэн бондовай зонаттан бу табаардар быһаччы туһанааччыга бараллар. Табаары тиэрдиинэн суһаллык тириэрдэр анал хампаанньалар дьарыктаналлар.
Харбиннааҕы кэлимсэ бондовай зона табаары харайыыга сөптөөх усулуобуйалаах, ону тэҥэ нолуокка чэпчэтиилэргэ тиһиктээх. Билигин бондовай зонаҕа Соҕуруу Кореяттан, Германияттан уонна Арассыыйаттан фирмалар үлэлииллэр.
Бүгүн Кытай Арассыыйа тас эргиэҥҥэ стратегическай партнерунан уонна бүтүн Азия-Чуумпу акыйаан регионун тэтимнээхтик сайдар рыногынан буолар. Онон сибээстээн чугастааҕы кэмҥэ электроннай коммерция Арассыыйа-Кытай эргиэҥҥэ-экэниэмикэҕэ сыһыаннаһыыларыгар сүрүн көмөлөһөөччүнэн буолуоҕа.
Айсен Николаев Харбиннааҕы кэлимсэ бондовай зона Саха сирин табаарын уонна өҥөтүн таска таһаарыыга эрэллээх дистрибьютер буоларын бэлиэтээтэ.
“Мамонт киинэ” ХЭТ дириэктэрэ Андрей Николаев, Харбиннааҕы кэлимсэ бондовай зона Дьаһалтатын кэмитиэтин бэрэссэдээтэлэ Лю Чжэньцзян уонна науканы уонна тиэхиньикэни бииргэ сайыннарыы бас хампаанньатын генеральнай дириэктэрэ Тун Чэнбо үс өрүттээх сөбүлэһиигэ илии баттастылар.
СӨ Инвестицияны тардыыга уонна экспоры өйөөһүҥҥэ агентствотын генеральнай дириэктэрэ уонна Лю Чжэньцзян эмиэ сөбүлэһии түһэристилэр.
Саха Өрөспүүбүлүкэтин Ил Дарханын уонна
Саха Өрөспүүбүлүкэтин Бырабыыталыстыбатын пресс-сулууспата.