Айсен Николаев Сайылык күнүнэн эҕэрдэлиир

Бөлөххө киир:

Ытыктабыллаах Сахабыт сирин олохтоохторо!

Барыгытын өрөспүүбүлүкэбитигэр Сайылык күнүн бырааһынньыгынан итиитик-истиҥник эҕэрдэлиибин! Тыа сирин олохтоохторугар махталбын тиэрдэбин, өбүгэлэрбит сирдэригэр-уоттарыгар, сайылыктарыгар олоххут-дьаһаххыт, үлэҕит-хамнаскыт тахсыылаах, дьоллоох-соргулаах буоллун!  

Бу күнү саха норуотун төрүт үгэстэригэр, аан дойдуга саамай хоту сүөһүнү иитии үйэлээх укулаатыгар  сүгүрүйэн, аан бастаан өрөспүүбүлүкэтээҕи бырааһынньык быһыытынан бэлиэтиибит

Сайылыкка көһүү – үтүө санаалаах чугас ыалларгын, доҕотторгун кытта уһун кыһын кэнниттэн көрсүһүүнү бэлэхтиир мэлдьи үөрүүлээх түгэн. Биллэн турар, мэччирэҥнээх сирдэргэ сүөһүнү мэччитэн үрүҥ илгэни үрүлүтэр туһуттан  сайылыкка көһөллөр.

Маннык үгэс билигин даҕаны Саха сирин аграрнай култууратын сорҕотунан буолар. Өрөспүүбүлүкэҕэ баар 350 сайылыкка 250 сайыҥҥы үүт пиэримэтэ баар.  Хас сайын ахсын сайылыкка тыа хаһаайыстыбатын балтараа тыһыынча кэриҥэ үлэһиттэрэ – ыанньыксыттар, бостууктар, үүт тутааччылар уонна да атыттар көһөллөр. Быйыл сайыҥҥы мэччирэҥҥэ 36 тыһыынча сүөһү тахсыаҕа.

Сайылыкка көһүү олохтоох оҥорон таһаарыы үрдээһинигэр, Саха сирин олохтоохторун үчүгэй хаачыстыбалаах, иҥэмтиэлээх этинэн уонна үүтүнэн хааччыйыыга дьоһун суолталаах. Ол иһин “Саха Өрөспүүбүлүкэтин тыатын хаһаайыстыбатын сайдыытын стратегическай хайысхаларын туһунан” Ыйаахха 2024 сылга диэри сүрүн соруктар истэригэр механизациялаах 100 сайыҥҥы пиэримэни – сайылыгы тутуу былааннаммыта, манна 10 тыһыынча сүөһү туруоҕа. Сайылыктары сөргүтүөхпүт, итилэргэ тыа сирин үлэһиттэрэ үлэлииллэригэр аныгы усулуобуйаны тэрийиэхпит.

Күндү биир дойдулаахтарым!

Бу кэрэ бырааһынньык өрөспүүбүлүкэҕэ үтүө үгэһинэн уонна тыа хаһаайыстыбатын сайдыытын көҕүлээччинэн, ол эбэтэр Саха сирин олохтоохторун уйгутун тупсарааччынан буоллун. Тыа сирин бары олохтоохторугар, үлэһиттэригэр дьолу-соргуну, нус-хас олоҕу баҕарабын! Сахабыт сирин уйгулаах сайына уйгуну-быйаҥы, олох үөрүүтүн уонна төрөөбүт дойдубутугар бары бииргэ көхтөөхтүк үлэлиирбитин түстээтин!

Айсен Николаев, Саха сирин Ил Дархана    

+1
0
+1
0
+1
0
+1
0
+1
0
+1
0
+1
0