Айсен Николаев Анаабыр оройуонугар: Табаһыттары кытта көрсүһүү, балыыһаҕа сылдьыы уонна култуура киинин арыйыы
Айсен Николаев кулун тутар 1 күнүгэр Анаабыр оройуонугар оробуочай сырыыта буолан ааста. Бастакы күн Саха сирин баһылыга табаһыттары кытта көрүстэ, учаастак балыыһатыгар уонна Үрүҥ Хайаҕа “Долган” хоту дойду норуоттарын култууратын уонна искусствотын дыбарыаһын арыллыытыгар сырытта.
Табаһыттары кытта көрсүһүү Майаан өрүс сиригэр-уотугар буолла, манна Илья Спиридонов аатынан МУП биир учаастага баар. Бу ыстаадаҕа 2 тыһыынчаттан тахса таба кыстаан турар. 95 үлэһиттээх тэрилтэҕэ сэттэ ыстааданан 12 тыһыынчаттан тахса табалаахтар. Таба этин “Анаабыр алмаастарыгар” уонна оройуон социальнай эбийиэктэригэр биэрэллэр.
Регион салайааччытыгар табаһыттар махталларын биллэрдилэр. Кинилэр улахан кыһалҕалары көрсүбэттэрин эттилэр. Арай уматык сыаната Саха сирин атын муннугар тэҥнээтэххэ олус ыарахан.
1991 сыллааҕы Үрүҥ Хайа учаастактааҕы мас балыыһатыгар сылдьарыгар Ил Дархан эмп үлэһиттэрин ыйытыыларыгар хоруйдаата. Бүгүн сэттэ куойкалаах балыыһаҕа 17 киһи үлэлиир. Эмчиттэри эмп тэрилэ тиийбэтэ долгутар.
Үрүҥ Хайаҕа “Долган” дыбарыаһы арыйыыга өрөспүүбүлүкэ Баһылыга, уустук усулуобуйаҕа үлэлиир эрээри култууранан уонна искусствонан дьарыктанар дьоҥҥо ытыктабыл бэлиэтэ буолан тутуллубутун эттэ.
“Биһиги Арктиканы сайыннарыы, олохтоох бырамыысыланнас ситиһиилэрин – төһө алмаас, ньиэп, гаас хостоммутун туһунан элбэхтик кэпсэтэбит. Ол эрээри Арктика зонатын сайыннарыы дьон олоҕун тупсарыы буоларын умнуо суохтаахпыт”, — диэтэ кини.
Култуура аныгы киинэ икки этээстээх. Манна 1456 кв. м. хореография саалата, изостудия, эбиэттиир саала, 70 миэстэлээх киинэ саалата, бибилэтиэкэ уонна 260 миэстэлээх актовай саала баар.
Саха Өрөспүүбүлүкэтин Ил Дарханын уонна Саха Өрөспүүбүлүкэтин пресс-сулууспата.