Өлүөнэни туоруур муоста бырайыага оннуттан хамсыаҕын туһунан Ил Дархан Айсен Николаев Анал этиитигэр бэлиэтээн эппитэ. Бэҕэһээ Москваҕа Федеральнай суол агентствотын научнай-техническэй сэбиэтигэр бу боппуруоһу дьүүлгэ таһаарда.
Мунньахха муоста тутуутугар өр кэмҥэ үлэлэспит уопуттаах экспертэр кытыннылар. Кинилэр араас барыйааны үөрэтэн көрдүлэр. Санатан эттэххэ, бу муоста тутуута Арассыыйаны ааһан бүтүн аан дойдуга ханна да суох бырайыак буолар. Биһиги өрөспүүбүлүкэбит курдук тыйыс усулуобуйалаах дойдуга улахан муоста тутуллара үгүс өрүттээх чинчийиини, үөрэтэн көрүүнү ирдиир.
Көрсүһүүгэ бырайыакка кыттыан баҕалаах инвестордар, Кытай Народнай Өрөспүүбүлүкэтиттэн “PowerChina International Group Ltd” уонна “ВИС” хампаанньа бэрэстэбиитэллэрэ, санааларын үллэһиннилэр. Былаан быһыытынан, муоста консорциум ньыматынан тутуллуохтаах. Ол эбэтэр хампаанньалар холбоһон инвестицияларын түмүүлэрин суотугар.
Федеральнай суол агентствотын салайааччытын солбуйааччы Дмитрий Прончатов Саха Өрөспүүбүлүкэтэ бу боппуруоһу РФ Тырааныспарын министиэристибэтигэр элбэхтэ туруорарын, РФ бэрэсидьиэнэ, бырабыыталыстыбата биэрбит соруктарын күннээҕи бэбиэскэтигэр тута сылдьан ирдиирин бэлиэтээн эттэ. Кини этэринэн, бу мунньах түмүгүнэн уопсай боротокуол оҥоһуллуоҕа, “Росавтодор” Саха сирин салалтатын кытары РФ бырабыыталыстыбатыгар муоста тутуутугар былааннарын оҥорон киллэриэхтэрэ.
Аграфена КУЗЬМИНА, “Саха сирэ” хаһыат, edersaas.ru