Ил Дархан Айсен Николаев салалталаах Саха сирин дэлэгээссийэтэ ааспыт нэдиэлэҕэ Японияҕа баран үлэлээтэ. Бу сырыы туох түмүгү аҕалбытын, туох этиилээх кэлбиттэрин туһунан маннык кэпсиир:
— Быйыл Арассыыйа уонна Япония бииргэ үлэлээһиннэригэр хардарыта анал сыллары биллэрбиттэрэ. Ол чэрчитинэн баран кэллибит. Экэниэмикэ миниистирин, Хоккайдо губернаторын кытары көрүстүбүт. Ону таһынан, парламент, туһааннаах министиэристибэлэр чилиэннэрин, улахан хампаанньалар салалталарын кытары кэпсэттибит. Инвестиционнай сэминээргэ бырайыактарбытын кэпсээтибит, сырдаттыбыт. Японияҕа Арассыыйа посола Михаил Галузин эрэгийиэннэр ыытар сэминээрдэриттэн биһиэнэ бастыҥнара буоларын бэлиэтээтэ. Мин санаабар, сырыыбыт ситиһиилээх. Кэпсэтиилэр үтүө түмүктэрдээх буоллулар. Бу көрсүһүүлэр бары инвестицияны киллэриигэ туһуламмыттара. Япония инвестордара Өлүөнэ өрүспүтүн туоруур муоста бырайыагын интэриэһиргээн ыйыталастылар. Корпорациялар бу бырайыакка Арассыыйа инвестордарын кытары бииргэ үлэлэһиэхтэрин баҕаралларын биллэрдилэр. Онон өрөспүүбүлүкэ сайдыытыгар улахан суолталаах көрсүһүүлэр буолан аастылар.
Аграфена КУЗЬМИНА, «Саха сирэ» хаһыат.