Обургу оҕолор, ыччаттар подъезка мусталларын эбэтэр элбэх киһини диэлэригэр мунньан айдаарар-куйдаарар ыаллары сөбүлээбэт, мэһэйдэтэр дьон баара өйдөнөр. Үлэ кэнниттэн киһи нус-бааччы сынньаныан баҕарар.
Томпо улууһугар итинник сыһыантан чуут иэдээн буола сыста.
Ол курдук, полиция участковай боломуочунайдара дьиэлэри кэрийэн, өйдөтөр-сэрэтэр үлэни ыыта сырыттахтарына, кинилэргэ элбэх кыбартыыралаах биир дьиэттэн иһитиннэрии киирбит. Бэҕэһээ киэһэ подъезка саа тыаһаабытын туһунан.
Участковайдар быһаарбыттарынан, ол киэһэ биир кыбартыыраҕа муусука тыаһа, күлсүү-салсыы, көр-нар бөҕөтө буолбут. Ол быыһыгар, дьиэлээх уол доҕотторун кытта подъезка табаахтыы тахсыбыттар. Ол турдахтарына, аҕа саастаах ыаллара киһи кэлэн, айдаарбаттарыгар эппит.
Эдэрдэр ону истиэхтэрэ баара дуо, саастаах киһи сэмэтин улахаҥҥа уурбатахтар, тарбанан да көрбөтөхтөр. Онуоха ыаллара «киһилии тылы өйдөөбөт буоллаххытына» диэн баран, саатын ылан, дьиэлээх уол диэки туһаайан ыппыт. Дьолго, таппатах.
Уус Маайаттан төрүттээх 61 саастаах киһиэхэ РФ Холуобунай кодексатын 119-с ыст. 1 чааһынан, ол эбэтэр, өлөрөрүнэн суоһурҕаныы бэлиэтэ баарынан, дьыала тэриллибит.
Бу туһунан СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн.