Аина Моисеева дзюдоҕа аан дойду призера буолла

Бөлөххө киир:

Бу күннэргэ спорду таптааччылар быһа көрдөрөр ханаалларга «хатанан» олордулар: сүүрүү, тустуу, дзюдо… Кимҥэ эрэ кыайтарыы хомолтото, кимҥэ эрэ кыайыы үөрүүтэ. Аан дойду таһымнаах күрэхтэһиилэргэ сахалар кытыннылар. Сүүрүктэртэн дьэ хайдах бэлэмнээхтэрин таһынан кытаанах санааны, тулууру тургутар итии салгын турда. Сардаанабыт тулуйда.

Казахстаҥҥа дзюдоҕа аан дойду ааттаахтара, туспа дойду туйгуннара, «мин кыайабын, мин хотобун» диэччи, этэргэ дылы, олох тимир курдук батары көрбүттэрэ, иҥиирдээх имигэстэрэ, бүдүрүйбэт сүһүөхтээхтэрэ, самныбат саннылаахтара мустубут саалаларыгар көрөөччү кытта кытаанаҕы, бырахсыыны, таһырҕас-лаһырҕас тыаһы тулуйара наада курдук буолла.

Биһиги оҕобут Аина Моисеева бу кэлиҥҥи үс ыйга тохтообокко улахан да киһи тулуйарыгар ыарахан кэмнэри этэҥҥэ ааста. Бииртэн биир эппиэтинэһэ үрдээн, тыҥааһына эбиллэн, таһыма тахсан  иһэр улахан күрэстэри ааста уонна эрэлбитин, тус бэйэтигэр туруоруммут сыалын толордо. Ол туоларын туһугар тугу сатыырын, туохха үөрэммитин барытын түмтэ. Аина тыҥааһыны тулуйарын ааһан кыайтарыы хомолтотун уйан уонна ону сүгэһэр оҥостубакка хамаанданан киирсиигэ киниэхэ түбэспит Баходированы кыл түгэнэ ыһыктыбытын таба тутан кураанаҕы куустарда. Дьэ, бу буоллаҕа — салгыҥҥа тимир тимиргэ охсуллар тыаһын курдук иһиллиэр дылы өй-санаа түмүллүүтэ, кыайыыга баҕа, бэйэҕэ эрэл, дьонун-сэргэтин иннигэр эппиэтинэс!

Аина биһиги эйигин убаастыыбыт, киэн туттабыт, үөрэбит, сахалыы сырылаччы сылаастык сыллыыбыт.

Аина төрөппүттэриҥ Людмила, Александр Моисеевтары уонна Казахстаҥҥа тиийэн сиэн оҕолорун ситиһиитин субу тутан олорон көрбүт эһээлээх, эбээни Зинаида Дмитриевна, Василий Кимович Борисовтары эҕэрдэлиибит. Александр быйылгы сылга оҕотугар көмө-тирэх буолан сир-дойду бөҕөтүн көрдө-иһиттэ, элбэҕи биллэ.

Күндү биир дойдулаахтарбыт, балаҕан ыйын 29 күнүн өйдөөҥ кэбиһиҥ. Бу күн Хатаска аан дойду призера баар буолла.

Наталья Руфова.

+1
0
+1
0
+1
0
+1
0
+1
0
+1
0
+1
0