Коронавирус дьаҥын тарҕаппат туһуттан, үгүстэр дьиэлэригэр олорор буоллахтарына, былаас уорганын уонна олоҕу-дьаһаҕы хааччыйар тэрилтэлэр, ол иһигэр АПК салааларын үлэһиттэрэ тигинэччи үлэлии сылдьаллар.
edersaas.ru
Нэһилиэнньэҕэ сибиэһэй ас-үөл баар буоларын хааччыйар «Дьокуускайдааҕы көтөрү иитэр фабрика», «Дьокуускайааҕы килиэп кэмбинээтэ» АУо-лар, астыыр-таҥастыыр хампаанньалар технологтара, оператордара, улуустардааҕы аһылык кэмбинээттэрин маастардара итиэннэ бородууксуйаны батарыы эйгэтин үлэһиттэрэ Бүтүн Арассыыйатааҕы аахсыйаҕа кыттыһаннар, соцситимнэринэн Эһиги тускутугар өрөөбөккө үлэлиибит (МыДляВасБезВыходных) флешмобтары оҥордулар.
Бу кинилэр күннэтэ үлэлиир-хамсыыр буоланнар, хас биирдии ыал остуолугар сибиэһэй килиэп, сымыыт, эт уонна үрүҥ ас уо.д.а. баар. Тыа хаһаайыстыбатын табаарын оҥорооччулар үтүө суобастаах үлэлэрин түмүгэр пиэрмэҕэ үлэ тиһигэ тохтообот, ынах ыанар, үүт астанар, сайаапка быһыытынан аадырыска тиэрдиллэр, сааскы ыһыы үлэтигэр бэлэмнэнии тэтимнээх, халаан уутун көрсөр дьаһаллар кыраапык быһыытынан ыытыллаллар. Онон, күндү доҕоттор, дьиэҕитигэр олоруҥ – барыбытыгар тиийэр ас-үөл баар!
Тыа хаһаайыстыбатын министиэристибэтэ тыа хаһаайыстыбатын табаары оҥорооччуларын Бүтүн Арассыыйатааҕы Эһиги тускутугар өрөөбөккө үлэлиибит (МыДляВасБезВыходных) диэн аахсыйаҕа кыттыһарга ыҥырар диэн пресс-сулууспа иһитиннэрэр.
Раиса Сибирякова, «Саха сирэ» хаһыат, edersaas.ru