Афанасий Лыткин: «Эр киһиэхэ сибэкки ордук чугас…»

Ааптар: 
Бөлөххө киир:

Соторутааҕыта Чурапчыга Чыаппара олохтооҕо Афанасий Лыткин тиэргэнигэр сибэкки арааһын олордорун туһунан батсаапка видеоматырыйаал кэлбитин көрөн баран, үгүс киһи сөхпүтэ.

edersaas.ru

Мин сибэкки үүннэрээччини бэйэтин кытта төлөпүөнүнэн сибээстэһэн, анаан кэпсэттим.

Арассааданы – тохсунньуга

 64 саастаах бочуоттаах сынньалаҥҥа олорор Афанасий Лыткин Сэбиэскэй кэмҥэ «Карл Маркс» аатынан сопхуоска бороон көрөөччүнэн үлэлээбит.

Сибэккини үүннэриигэ хаһааҥҥыттан ылсыбыккыный?

— Биэнсийэҕэ 55 сааспар тахсыбытым. Онон иллэҥсийбиччэ, үүнээйигэ ылсыбытым. Уопсайынан, сибэккини үүннэриигэ 50-ча сааспар ылларбытым. Сиэмэни интэриниэтинэн сакаастаан ылабын. Ютубка көрөн, сөбүлээтэхпинэ, ымсыырдахпына, чуо ол сибэккини үүннэрэбин.

Арассааданан үүннэрэҕин дуо?

— Оннук. Тохсунньуга, олунньуга, кулун тутарга бастакы араскыларым тахсаллар. Ону муус устарга поликарбонат тэпилииссэҕэ таһааран бүрүйэн, салгыҥҥа үөрэтэбин. Тоҥмот, тымныыны тулуйумтуо. Тэпилииссэм 3х4 кв м иэннээх.

Хаар түһүөр диэри

Тэлгэһэҥ толору сибэкки эбит дии? Дьиэҥ иһэ эмиэ оннук буолуо?

— Убайбынаан биир тиэргэҥҥэ олоробут. Онон тэлгэһэбит — икки ыалынан. Дьиэм иһигэр кыһыҥҥы сибэкки үүнэр.

Сибэккилэриҥ хаһааҥҥа диэри хараҕы сымнаталларый?

— Сороҕо – балаҕан ыйыгар диэри, сорох — хаар түһүөр диэри турар.

Сибэкки арааһа

Сибэккигэр уу кутаргар да бириэмэҥ барар эбит

— Киэһээ сөрүүкээбитин кэннэ уу кутабын. Сарсыарда «өлбүттэри» хомуйабын.

Ама, ол хайдах – «өлбүттэри» ?!

— Петуния саҥаттан саҥа сибэккилиир. Ол иһин сабылынна да, «өлбүт» аатырар. Ол ону хомуйуу туспа үлэ.

Сибэккиҥ арааһа үгүс буолуо?

— Элбэх. Космея, вьюнок, календула, флокс, подсолнух, ромашка, гладиолус, георгин, бархатцылар, годеция, лаватера…Ааттыы туруохпун сөп. Сыл аайы сайын буолла да, бу сибэккилэрим миэхэ тиэргэммэр «ыалдьыттыы» кэлэллэр.

Вюногум мэнигэ сүрдээх. Араастаан сыыйыллан үүнэр. Онуоха мин тимир килиэккэни ууран биэрбитим. Онтум бэйэтэ хатаастан тахсан үүнэн, билигин күөх истиэнэ курдук буолла. Салайан эрэ биэриэххэ наада.

Үксүгэр, биһиги дьахтар аймах эрэ сибэккини олордор айылгылаах курдук саныыбыт. Онуоха Афанасий Лыткин холку бэйэлээхтик: «Эр киһиэхэ сибэкки ордук чугас…» диэн биир этиинэн, айылҕаттан үүнээйини сөбүлүүр буоллуҥ да, тугу баҕарар үүннэриэххэ сөбүн бэлиэтээн, кэпсэтиибитин түмүктээн кэбистэ.

Елена ПОТОЦКАЯ, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0