Былырыын ахсынньыга Абый улууһун Киэҥ Күөл нэһилиэгэр кыһыҥҥы суол аһыллыбакка, маҕаһыыннарыгар бородуукта бүтэн, саргылаах Саҥа дьылы аһа-үөлэ суох көрсө сыспыттара. Кинилэр дьоллоругар ахсынньы 30 күнүгэр улуус кииниттэн бөртөлүөт мандарин, дьаабылыка, банан, апельсин, хортуоппуй, сөбүөкүлэ, моркуоп, луук, сымыыт уонна халбаһы илдьэн, Күөҥ Күөл олохтоохторо саргылаах Саҥа дьылы дьон сиэринэн көрсүбүттэрэ.
Александр Тарасов, «Саха сирэ» хаһыат, https://edersaas.ru/
Киэҥ Күөл олохтооҕо Яна Садовникова:
– Бөртөлүөтүнэн бородуукта кэлэн, Саҥа дьылы этэҥҥэ көрүстүбүт. Кэлбит бородууктаны лимиит быһыытынан кээмэйдээн түҥэппиттэрэ. Ыал аайы биирдии киилэ дьаабылыка, мандарин, апельсин тиксибитэ. Билигин икки маҕаһыын эмиэ кураанахсыйа быһыытыйдылар. Кыһыҥҥы суол аһылларын күүтэбит.
Абый улууһун баһылыга Михаил Никулин:
– Кырдьык, кыһыҥҥы суол кыайан аһыллыбакка турар эрээри, үлэ барар. «Дорога Арктики» тэрилтэ түүннэри-күнүстэри суолу оҥоро сылдьар. Киэҥ Күөл Белай Гораттан 70 км. Ону ити бүгүҥҥү күҥҥэ аҥарын оҥордулар. Этэҥҥэ буоллаҕына, бу нэдиэлэ бүтүүтүгэр суолу оҥорооччулар Киэҥ Күөлгэ тиийиэхтэрэ.
Билигин Киэҥ Күөл маҕаһыыннарыгар төһө бурдук, саахар, чэй, бородуукта баарын учуоттаан баран, баҕар, бу күннэргэ эмиэ бөртөлүөтү көтүтүөхпүт.
Кылгас ыспыраапка
Киэҥ Күөлгэ билигин 33 ыал олорор. Санатар буоллахха, былырыын алтынньыга Абый улууһугар 2,5 миэтэрэ халыҥнаах хаар түһэн, улууска ыарахан балаһыанньа үөскээбитэ. Итинтэн сэдиптээн улуус сорох нэһилиэктэригэр кыһыҥҥы суол аһыллыбакка турар.