Ааспыт сылга 27 хочуолунай үлэҕэ киирдэ
Олох-дьаһах

Ааспыт сылга 27 хочуолунай үлэҕэ киирдэ

Өрөспүүбүлүкэ улуустарын сылааһынан хааччыйар “СӨ ОДьКХ” ГУП хочуолунайдары тутууга тэтимин ыһыктыбат. Ол курдук, 2019 сыл түмүгүнэн 27 саҥа уонна саҥардыллыбыт хочуолунай үлэҕэ киирдэ.

edersaas.ru

Тустаах тэрилтэ хоту улуустарга хамсааһыны таһаарбыт. Ол курдук, Үөһээ Халыма оройуонун Зырянка бөһүөлэгэр 12,5 мегаватт кыамталаах механизированнай хочуолунай тутулунна. Инникитин бу хочуолунай хаарбах уонна саахалланар туруктаах дьиэлэртэн дьону көһөрүү бырагырааматынан тутуллар элбэх кыбартыыралаах дьиэлэргэ сылааһы биэриэҕэ.
Былырыын Орто Халыма куоратыгар “Анкудинка” диэн саҥа хочуолунай үлэҕэ киирэн, саахалланар туруктаах 4 №-дээх хочуолунайы солбуйбута. Бу хочуолунай 124 олорор дьиэни, аэропуорт дьиэтин уонна да атын эбийиэктэри хааччыйар.
Муома оройуонугар тэхиньиичэскэй өттүнэн саҥардыллан баран, “Новая Центральная” үлэтин саҕалаабыта. Ааспыт сыл күһүнүттэн Суон Тииккэ эмиэ саҥа хочуолунай үлэлии турар.
Киин оройуоннар да хаалсыбатылар. Таатта оройуонугар Уус Таатта сэлиэнньэтигэр ньиэбинэн үлэлиир эргэ хочуолунай оннугар таас чоҕунан оттуллар эбийиэк үлэҕэ киирэн, кэтэх ыаллар холбонон абыраннылар.
Маны сэргэ Мэҥэ Хаҥаласка, Хаҥаласка уонна атын да оройуоннарга кытаанах оттугунан үлэлиир хочуолунайдар саҥардылыннылар уонна тутуу да ыытылынна.
“СӨ ОДьКХ” ГУП генеральнай дириэктэрэ Виталий Чикачев тэрилтэ инвестиционнай бырагырааманан үлэтин салгыаҕа диэн бэлиэтээтэ. Онон ыарахан сыаналаах оттуктан айылҕа гааһыгар уонна таас чоххо көһөрүү былааннаахтык ыытыллара эрэбил.

“СӨ ОДьКХ” ГУП пресс-сулууспатын матырыйаалынан
Бэлэмнээтэ Женни Стрюкова.

0
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

четырнадцать − три =