Бүгүн, от ыйын 14 күнүгэр, 11:00 чааска СӨ Доруобуйа харыстабылын миниистирэ Елена Борисова уонна Үлэ, социальнай сайдыы миниистирэ Елена Волкова эрэгийиэҥҥэ коронавирус балаһыанньатын туһунан брифинг ыыттылар.
Доруобуйа харыстабылын миниистирэ Елена Борисова:
— Ааспыт сууккаҕа 60 киһи коронавирус дьаҥар сутулунна уонна биир киһи тыына быһынна. Чугас дьонугар дириҥ кутурҕаммытын биллэрэбит. Лабораторияларга 2000-ттан тахса тест оҥоһулунна.
Мин «Телеграм» ханаалларга дьон куруук сураһар анаалыһы туттарыы туһунан ыйытыыга хоруйдуохпун баҕарабын. Биһиэхэ ыам ыйыттан анаалыһы тутуу ньымата уларыйбыта. Бастакы күҥҥэ тута анаалыһы ыларга дьулуспаппыт, 8-10 күҥҥэ ылар буоллубут. Бу быдан чуолкай түмүктэри көрдөрөр ньыма. Оттон ыарыы сибикитэ суох буоллаҕына, анаалыһы олох даҕаны ылымыахха сөп.
Саха сиригэр ааспыт сууккаҕа 60 киһи дьаҥҥа сутулунна. Ол иһигэр Дьокуускайга 31 киһи, Алдаҥҥа 17 киһи, Мииринэйгэ уонна Нерюнгрига биэстии киһи, Хаҥаласка икки киһи ыарыйда.
edersaas.ru