Оскуоланы бүтэрээт даҕаны аармыйаҕа барбыт дьон, кэлээт сылларын халтай сүтэрбэт инниттэн университекка бэлэмнэнии салаатыгар киирэн, саас биир кэлим эксээмэни туттаран, үрдүк үөрэххэ киирэллэрэ үгүс.
“Саха сирэ” хаһыат, edersaas.ru
ХИФУ-га бэлэмнэнии салаата үлэлээбитэ быданнаата. Үрдүк үөрэххэ киириэн баҕарар дьон чопчу биридимиэттэргэ тиийэн бэлэмнэнэн, биир кэлим эксээмэни туттараллар. Манна даҕатан эттэххэ, ХИФУ Үрдүк үөрэх иннинээҕи уонна профориентация фокультетын декана Светлана Федорова иһитиннэрбитинэн, аармыйа кэнниттэн бэлэмнэнии салаатыгар (подготовительнай) кэлбит эдэр дьон босхо үөрэниэн сөп эбит. Бүддьүөт миэстэтигэр киирэр инниттэн хамандыырдарыттан ирдэбилгэ толору сөп түбэһэр мэктиэ суруктаах (рекомендация) кэлэллэрэ булгуччулаах. “Хамандыырдарыттан ылбыт ыспыраапкаларын биһиэхэ аҕалаллар, бэлэмнэнии бөлөххө босхо үөрэнэллэр, ону таһынан 4,5 тыһыынча солкуобай истипиэндьийэ ылаллар”, — диэн декан быһаарда.
Бастакы потокка алтынньыттан үөрэнэн баран, кулун тутарга эксээмэн туттараллар. Иккис потокка тохсунньуттан бэс ыйыгар диэри үөрэнэллэр. Билигин иккис потокка кэлиэхтэрин сөп диэн этэр. Бэлэмнэнии бөлөҕөр төлөбүрдээҕи таһынан, сыллата 30 бүддьүөт миэстэтэ көрүллэр. Ол иһигэр аармыйаттан кэлбиттэр, тулаайахтар уонна инбэлииттэр киирэллэр. Бэлэмнэнии бөлөххө үөрэнэр дьон университет бибилэтиэкэтигэр сылдьыахтарын, куруһуоктарга дьарыктаныахтарын сөп, хоту улуустарга уопсайга миэстэ көрүллэр. Быһатын эттэххэ, устудьуон олоҕунан олороллор.
Людмила ПОПОВА, “Саха сирэ” хаһыат, edersaas.ru
Хаартыска: Ил Түмэн саайтыттан.