Нуучча дуобатыгар аан дойду быйылгы чөмпүйэнээтэ алтынньы 20-29 күннэригэр Санкт-Петербург куоракка ыытыллар. Күрэстэһии “Москва” отельга буолуоҕа.
Чөмпүйэнээккэ түөрт уонча дойдуттан күүстээх дуобатчыттар, ол иһигэр сүүрбэттэн тахса гроссмейстер кыттара күүтүллэр. Саха сириттэн бу күрэхтэһиигэ 2015 сыллааҕы аан дойду чөмпүйэнээтин түмүгүнэн уонна 2016 сыллааҕы көрдөрүүлэринэн саха үс дуобатчыта — Гаврил Колесов, Николай Стручков уонна Николай Гуляев — кыттар быраабы ылла.
Дуобатчыттар үс бырагыраманан күрэстэһиэхтэрэ: блицкэ (3 мүнүүтэ + хас биирдии хаамыыга 2 сөк.), түргэн оонньууга (7 мүнүүтэ + хаамыыга 5 сөк.) уонна классическайга (45 мүнүүтэ + хаамыыга 15 сөк).
Санатар буоллахха, 2015 сыллаахха ыытыллыбыт аан дойду чөмпүйэнээтигэр Николай Гуляев боруонса мэтээли ылары ситиспитэ. Кыайыылааҕынан Сергей Белошеев (Крым) буолбута. Белоруссия дуобатчыта Андрей Валюк иккис миэстэлэммитэ.
Роман Попов, “Саха сирэ” хаһыат, edersaas.ru